فوتو: ۆۆس.

اقش پرەزيدەنتىنىڭ ۇلى كىشى دونالد ترامپ حيللاري كلينتون ۇستىنەن كومپرومات اقپارات جيناۋ ءۇشىن رەسەيلىك زاڭگەرمەن كەزدەسكەن دەپ جازادى The New York Times باسىلىمى.

New York Times گازەتىنىڭ مالىمەتى بويىنشا، 2016 جىلدىڭ 16 ماۋسىم كۇنى دونالد ترامپتىڭ ۇلى «ترامپ تاۋەر» عيماراتىندا كرەملمەن قاتىسى بار ناتاليا ۆەسەلنيتسكايامەن كەزدەسكەن.

New York Times باسىلىمىنىڭ بۇل مالىمدەمەسىن كىشى ترامپ جوققا شىعارماعان. بىراق كەزدەسۋ بارىسىندا ۆەسەلنيتسكايانىڭ حيللاري كلينتون جايىندا ماردىمدى اقپارات بەرە الماعاندىعىن ايتقان.

ال ناتاليا ۆەسەلنيتسكايانىڭ ايتۋىنشا، كىشى ترامپپەن كەزدەسۋ كەزىندە ولار پرەزيدەنت سايلاۋى جايىندا ەشقانداي اڭگىمە قوزعاماعان.

دونالد ترامپتىڭ رەسمي وكىلىنىڭ حابارلاۋىنشا، ترامپ ءوز كومانداسىنىڭ ۆەسەلنيتسايامەن كەزدەسكەندىگى جايىندا ەشنارسە بىلمەگەن جانە ول كەزدەسۋگە قاتىسپاعان.

قازىرگى تاڭدا اقش كونگرەسسى مەن فبر پرەزيدەنت سايلاۋى كەزىندە ترامپ كومانداسىنىڭ مۇشەلەرى كرەملمەن بايلانىستا بولعاندىعى جايىندا تەكسەرۋ جۇمىستارىن جالعاستىرۋدا.

ەستەرىڭىزگە سالايىق، اقش پرەزيدەنتى دونالد ترامپ پەن رەسەي باسشىسى ۆلاديمير پۋتين گەرمانيانىڭ گامبۋرگ قالاسىندا G20 ءسامميتى اياسىندا كەزدەسكەن بولاتىن. كەزدەسۋ بارىسىندا ءسۇريا، ۋكراينا، كيبەرشابۋىل، رەسەيلىكتەردىڭ اقش سايلاۋىنا ارالاسۋى جايىندا اڭگىمە قوزعاعان.

 “The Qazaq Times”