دونالد ترامپ قر پرەزيدەنتى مەن قازاقستاندىقتاردى قۇتتىقتاپ حات جولدادى

اقش پرەزيدەنتى دونالد ترامپ قازاقستان پرەزيدەنتى نۇرسۇلتان نازارباەۆتى جانە بارلىق قازاقستاندىقتاردى ورتا ازيادا العاش رەت وتكىزىلىپ وتىرعان حالىقارالىق «ەكسپو-2017» مامانداندىرىلعان كورمەسىنىڭ وتكىزىلۋىمەن قۇتتىقتادى. بۇل تۋرالى اقوردانىڭ رەسمي سايتى حابارلاپ وتىر.

اقش پرەزيدەنتى ءوزىنىڭ قۇتتىقتاۋىندا اتالعان الەمدىك شارانىڭ ارقاسىندا قازاقستاننىڭ جانە الەم ەلدەرىنەن كەلەتىن ميلليونداعان قوناقتار ادام پاراساتىنىڭ تۋىندىلارى سانالاتىن تەحنولوگيالىق يننوۆاتسيا مەن 115 ەلدىڭ تاماشا ارىپتەستىگىنە كۋا بولاتىنىن جەتكىزگەن. ترامپ حاتىندا: «امەريكا قۇراما شتاتتارى استاناداعى «ەكسپو-2017» كورمەسىنە قاتىسىپ، امەريكانىڭ ەنەرگەتيكا، عىلىم جانە تەحنولوگيا سالالارىنداعى ۇزدىك جەتىستىكتەرىن، سونداي-اق سان قىرلى مادەنيەتىمىزدى كورسەتۋدى زور مارتەبە سانايدى»، – دەپ جازعان.

سونداي-اق، د. ترامپ اقش پەن قازاقستان اراسىنداعى شيرەك عاسىرداعى ستراتەگيالىق سەرىكتەستىكتىڭ ماڭىزدى اتاپ وتكەن. قۇراما شتاتتاردىڭ الداعى ۋاقىتتا دا وڭىردەگى بەيبىتشىلىكتى، تۇراقتىلىق پەن ءوسىپ-وركەندەۋدى قولداۋعا نيەتتى ەكەنىن ايتىپ وتكەن.

اقش پرەزيدەنتى حاتىندا: «پرەزيدەنت مىرزا، «ەكسپو-2017» كورمەسى ارقىلى ەنەرگەتيكالىق قاۋىپسىزدىك ماسەلەلەرى جونىندەگى جاھاندىق ديالوگتى ودان ءارى ىلگەرىلەتۋدەگى ءسىزدىڭ كوزقاراسىڭىز بەن كوشباسشىلىعىڭىز ءۇشىن، سىزگە جانە قازاقستانعا ءىلتيپاتىمدى بىلدىرەمىن. ءوزارا سىيلاستىق پەن ورتاق مۇددەگە نەگىزدەلگەن اقش-قازاقستان اراسىنداعى ستراتەگيالىق سەرىكتەستىك ودان ءارى نىعايا تۇسەدى دەپ سەنەمىن»، – دەيدى د. ترامپ.

“The Qazaq Times”