اسكەري قىزمەتكەرلەردىڭ ەڭبەك دەمالىسىنىڭ مەرزىمى ۇزارتىلدى

2017 جىلعى ماۋسىمدا قازاقستان رەسپۋبليكاسىنىڭ پرەزيدەنتى «قورعانىس پەن اسكەري قىزمەت ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى، دەپ حابارلايدى قر قورعانىس مينيسترلىگىنىڭ ءباسپاسوز قىزمەتى.

قابىلدانعان زاڭدا اسكەري قىزمەتشىلەرگە اسكەري قىزمەت وتكەرۋ ۇزاقتىعى مەن جاعدايىنا قاراي جىل سايىنعى نەگىزگى ەڭبەك دەمالىسىنىڭ مەرزىمى ۇلعايتىلدى. بۇل اسكەري قىزمەتشىلەردىڭ عانا ەمەس، سونىمەن بىرگە، ولاردىڭ وتباسى مۇشەلەرىنە الەۋمەتتىك حال-جاعدايىنا وڭ اسەر ەتەدى.

«پودپولكوۆنيك» شەنىندەگى اسكەري قىزمەتشىلەرگە اسكەري قىزمەتتە بولۋدىڭ شەكتى مەرزىمى قىرىق سەگىز جاسقا دەيىن ۇزارتىلدى. بۇل جەكەلەگەن اسكەري قىزمەتشىلەرگە اسكەري قىزمەتتە بولۋدىڭ شەكتى جاسىنا دەيىن قىزمەت ەتۋگە مۇمكىندىك بەرەدى.

اتالعان زاڭ اسكەري قىزمەتكە جانە ارنايى مەملەكەتتىك ورگاندار قىزمەتىنە كىرۋ، وتكەرۋ جانە بوساتىلۋ كەزىندە، ونىڭ ىشىندە، قر مەن شەتەل مەملەكەتتەرىنىڭ ءبىلىم بەرۋ ۇيىمدارىندا وقىتا وتىرىپ،  كوزقاراستى بىرىزدەندىرۋ، سونداي-اق قر قارۋلى كۇشتەرىنىڭ قۇرامىنا اۋماقتىق قورعانىس قۇرالىمدارىن ەنگىزە وتىرىپ،  ەلىمىزدىڭ قورعانىسىنىڭ ورتاق جۇيەسىنە اۋماقتىق قورعانىستى كىرىكتىرۋ جونىندە تۇجىرىمدامالىق مىندەتتەردى شەشۋگە باعىتتالعان.

جاڭا زاڭدا قارۋلى كۇشتەردىڭ، ارنايى مەملەكەتتىك جانە قۇقىق قورعاۋ ورگاندارىنىڭ مۇقتاجدىعى ءۇشىن مەملەكەتتىك قورعانىس تاپسىرىسىن قالىپتاستىرۋ، ورنالاستىرۋ جانە ورىنداۋ ءتارتىبى جەتىلدىرىلگەن، سونداي-اق قورعانىس، كولىك، ساۋدالىق تەڭىزدە ءجۇزۋ، اۋە كەڭىستىگىن، جول قوزعالىسىن پايدالانۋ اياسىندا  زاماناۋي قاۋىپ-قاتەرلەردى ەسكەرە وتىرىپ، ۇكىمەتتىڭ ۋاكىلەتتىلىكتەرى،  قورعانىس مينيسترلىگى مەن باس شتابتىڭ فۋنكتسيالارى ناقتىلانعان.

“The Qazaq Times”