ترامپ ساپارلاي كەلگەن ءمۇن جا-ينگە كەزدەستى. فوتو: "شينلاڭ" اگەنتتىگى سايتى.

اقش جەرگىلىكتى ۋاقىتىمەن 30 ماۋسىم تۇستەن بۇرىن (استانا ۋاقىتىمەن 1 ماۋسىم), سول ەلدە ساپارلاي بارعان وڭتۇستىك كورەيا پرەزيدەنتى ءمۇن جا-ين، زىمىرانعا قارسى «ساد» جۇيەسىن ورناتۋ شەشىمى قىتايمەن جەتكىلىكتى كونسۋلتاتسيالار جۇرگىزۋگە جارامايتىنىن اشىق مويىندادى. ول تاعى وڭتۇستىك كورەيا تارابى قىتايدىڭ «ساد» جۇيەسى تۋرالى بىلدىرگەن نارازىلىعىن تولىقتاي تۇسىنەتىنىن جەتكىزدى. اتالعان ماسەلەدە بەيجىڭمەن كەلىسسوزدەر جۇرگىزۋگە ۇمىتكەر ەكەنىن دە ايتىپ ءوتتى. بۇل تۋرالى قىتايلىق «شينلاڭ» اقپارات اگەنتتىگىنىڭ رەسمي سايتى حابارلاپ وتىر.

رەسەي «سپۋتنيكتىك» اگەنتتىگىنىڭ حابارلاۋىنشا، ءمۇن جا-ين اقش-تىڭ ستراتەگيالىق جانە حالىقارالىق زەرتتەۋ ورتالىعىندا سويلەگەن سوزىندە: « شىنىندا، ءبىز جۇيەنى ورنالاستىرۋ شەشىمىن جاريالاۋدان بۇرىن، وسى ماسەلە بويىنشا، وڭتۇستىك كورەيا ۇكىمەتى مەن قىتاي حالىق رەسپۋبليكاسى اراسىندا  جەتكىلىكتى ديپلوماتيالىق تالقىلاۋ الىپ بارىلعان جوق»، – دەدى. ول جانە قىتايمەن الداعى ۋاقىتتا «ساد» جۇيەسى ماسەلەسىندە كەڭەيتىلگەن كەزدەسۋ وتىرىسىن وتكىزەتىندەرىن دە جەتكىزدى.

«ساد» جۇيەسىنىڭ، شىن مانىسىندە، ناتيجەسى كورنەكتى قورعانىس قۇرالى بولعانىمەن، قورشاعان ورتاعا جانە ءوڭىردىڭ قاۋىپسىزدىگى مەن ورنىقتىلىعىنا تيگىزەتىن ىقپالى تولىق ويلاستىرىلماعان.  اقش وڭتۇستىك كورەيادا جۇيەنى ورنالاستىرۋ شەشىمىن جاريالاعاننان تارتىپ، قىتاي جاعى بۇعان تۇبەگەيلى قارسىلىق تانىتىپ كەلەدى. سەبەبى، بۇل جۇيە سولتۇستىك كورەيادان ۇشاتىن زىمىراندارمەن قوسا، قىتايدىڭ 5/3 بولىگىندەگى تەرريتوريادان كوتەرىلەتىن بارلىق زىمىرانداردى اتىپ قۇلاتۋعا قابىلەتتى. سوندىقتان، قىتاي ءوز قۇقىعىن قورعاۋ ماقساتىندا «ساد» جۇيەسىنىڭ ىرگەسىنە كەلىپ ورناي قالۋىن قالامايدى. بۇل بىلتىرعى جىل سوڭىنان بەرى قىتاي مەن اقش، قىتاي-وڭتۇستىك كورەيا، سونداي-اق، سولتۇستىك شىعىس ازيا قايشىلىعىنىڭ ماڭىزدى ءبىر بۋىنى بولىپ كەلگەن بولاتىن.

كورەيا ۇكىمەتى «ساد» جۇيەسىن ورناتۋدى قايتا قاراۋعا ۇسىنۋ ارقىلى، اقش-تان كەلەتىن قىسىمدى ازايتتى. ەندى ءبىر جاعىنان قىتايدىڭ سالقىن قاباعىن جادىراتتى. كورەيا پرەزيدەنتى بۇل جولعى اقش ساپارىندا ترامپقا دا، قىتايعا دا ۇنامدى ۇستانىممەن ەكى الىپ بيگە شىقتى دەۋگە بولادى.

“The Qazaq Times”