ايەل ءمۇسىنى ەكى ەلدىڭ ديپلوماتياسىنا اسەر ەتتى

جاپونيانىڭ وڭتۇستىك كورەياداعى كونسۋلدىعى الدىنا، ەكىنشى دۇنيەجۇزىلىك سوعىس كەزىندە قۇلدىققا الىنعان ايەلدەردى بەينەلەيتىن ءمۇسىننىڭ قويىلۋى، ەكى ەل اراسىندا ديپلوماتيالىق ارازدىققا جول اشتى.

جاپونيا ۇكىمەت وكىلى يوشيحيدە سۋگا سەۋلدەگى وكىلەتتى جانە توتەنشە ەلشى ياسۋماسا ناگامينەنى جانە بۋسان باس كونسۋلىن كەرى شاقىرعانىن حابارلادى.

وتكەن جىلعى ەكى ەل اراسىندا جاسالعان كەلىسىمدى ەسكە العان سۋگا ءمۇسىننىڭ كونسۋلدىق الدىنا قويىلۋىن «وتە وكىنىشتى» دەپ باعالادى.

وسى ىسكە بايلانىستى، وڭتۇستىك كورەيانىڭ سىرتقى ىستەر مينيسترلىگى دە جاپونيانىڭ وكىلەتتى ەلشىلەرىن كەرى شاقىرۋىن «وكىنىشتى» دەپ اتادى.

ەسكەرتكىش، وتكەن ايدىڭ اياعىندا بەلسەندىلەر تاراپىنان جاپونياعا ەڭ جاقىن پورت قالاسى بۋسانداعى كونسۋلدىق الدىنا قويىلعان بولاتىن. ول – ەكىنشى دۇنيەجۇزىلىك سوعىس كەزىندە جاپون ارمياسى  قۇلدىققا ۇستاعان وڭتۇستىك كورەيالىق ايەلدەردىڭ سيمۆولى.

پوليتسيا تاراپىنان الىپ تاستالعان ءمۇسىن قوعامنىڭ تالاپ ەتۋى جانە جەرگىلىكتى ۇكىمەتتىڭ شەشىمىمەن، قايتادان كونسۋلدىق عيماراتى الدىنا ورنالاستىرىلعان بولاتىن.

1910-1945 جىلدار اراسىندا كورەيا، فيليپپين، تايۋان جانە باسقا ازيا ەلدەرىنەن شامامەن 200 مىڭ ايەل،  كورەيانى باسىپ العان جاپون اسكەرلەرىنە جىنىستىق قىزمەت وتەۋگە ماجبۇرلەنگەن.

سوعىس جىلدارىندا جاپون اسكەرلەرى تاراپىنان قورلانعان وڭتۇستىك كورەيالىق ايەلدەردىڭ قازىر 40 شاقتىسىنىڭ كوزى ءتىرى.

2015 جىلى توكيو مەن سەۋلدىڭ ۇزاق ۋاقىت جۇرگىزگەن كەلىسىمىنىڭ نەگىزىندە، وڭتۇستىك كورەيا ۇكىمەتى تاراپىنان انىقتالعان 238 ايەلدەردىڭ جانۇيالارى مەن قازىر كوزى ءتىرى 40 ايەلدىڭ ەمدەلۋى جانە باسقا دا ماتەريالدىق قاجەتتىلىكتەرىن قامتاماسىز ەتۋ ءۇشىن ارنايى قور قۇرعان.

«The Qazaq Times»