فوتو: fordauthority.com

حالىقارالىق  اۆتوشوۋ, ياعني، قاڭتار ايىنىڭ 8-22 ارالىعىندا اقش-تىڭ دەترويت قالاسىندا حالىقارالىق اۆتوكورمە وتپەك. حالىقارالىق اۆتوسالون سانالاتىن NAIAS ۇيىمى (North American International Auto Show)  اتالمىش شارانى سولتۇستىك امەريكانىڭ Cobo – ەڭ  ۇلكەن كورمە ورتالىعىندا ۇيىمداستىرادى. الاڭ كولەمى – 700 مىڭ شارشى مەتر.    

  

مۇندا الەمنىڭ ۇزدىك اۆتو وندىرۋشىلەرى ۇسىنعان جاڭا تەمىر تۇلپارلاردىڭ تۇساۋى كەسىلمەك. NAIAS شاراسى اياسىندا  700 سەريالى مودەلدەر مەن 45 تۇجىرىمدامالىق (نەمەسە كونتسەپتۋالدىق) اۆتوموبيلدەر ۇسىنىلادى. ۇيىمداستىرۋشىلاردىڭ بولجاۋى بويىنشا، كورمەنى 1 ملن-نان اسا ادام تاماشالايدى. بۇل اۆتوشوۋ، ءداستۇر بويىنشا، العاشقى اپتاسىندا تەك باق وكىلدەرى مەن ارنايى ماماندار ءۇشىن جۇمىس ىستەيدى. ال، قاراپايىم حالىقتىڭ 13 قاڭتاردان باستاپ كىرۋىنە مۇمكىندىگى بار. جوبا ۇيىمداستىرۋشىلارىنىڭ الدىن-الا باعالاۋى بويىنشا، اتالمىش كورمەدەن شامامەن 450-500 ملن $ (اقش دوللارى) پايدا تۇسەدى.

NAIAS ديرەكتورلار كەڭەسىنىڭ ەكس-توراعاسى Robert Thibodeau جىل سايىن وتەتىن شارانىڭ  ەكونوميكالىق اسەرىنە ريزا ەكەندىگىن جەتكىزدى:

 «قوناق ءۇي، مەيرامحانا، وزگە دە ساۋدا ورتالىقتارى، جەكە كاسىپورىندار بولسىن، بارلىق سالادا قىزمەت ەتىپ جۇرگەن ماماندار مەن ولاردىڭ وتباسىلارىنا وسى سالوننان پايدا كەلەدى. ءبىزدىڭ ماقساتىمىز – وسى ميچيگاندا ەكونوميكالىق تۇراقتىلىعىمىزدى ساقتاۋ».

گۇلىم رىسقۇل

«The Qazaq Times»