كاتار ءسىم باسشىسى. فوتو: تۇرىك تەلە-راديو

كاتار ۇكىمەتى وزدەرىنە ديپلوماتيالىق داعدارىس ورناتقان اراب ەلدەرىنىڭ كاتارعا قاراتقان ەمبارگونى توقتاتپاسا، ءبىز دە كەلىسسوزدى جۇزەگە اسىرمايمىز دەپ وتىر. بۇل تۋرالى «اناتولى» اقپاراتتاق اگەنتتىگىنىڭ سايتىندا جازىلدى.

كاتاردىڭ سىرتقى ىستەر ءمينيسترى شەيح مۇحاممەد يبن ابدۋراحمان جاسيم ءال-ساني ەلدىڭ ورتالىق قالاسى دوحادا جۋرناليستەردى قابىلداعاندا: «كاتارعا باعىتتالعان قىسىمدار توقتامايىنشا، كەلىسسوزگە كەلۋ مۇمكىن ەمەس. ورىن العان قايشىلىقتاردى شەشۋ ءۇشىن كەلىسسوز كەرەك، ال كەلىسسوز ءۇشىن كاتارعا باعىتتالعان داعدارىس توقتاتىلۋى، اراب ەلدەرى وزدەرىنىڭ شارالارىن توقتاتۋى ءتيىس»، – دەدى.

وسىعان دەيىن وڭىردەگى مۇددەلى تاراپتار شىعاناق ەلدەرى كەڭەسىندە كەلىسسوز جۇرگىزۋ ارقىلى كاتار داعدارىسىن جاقسارتۋدى العا تارتىپ كەلگەن. دەگەنمەن كاتار ءمينيسترىنىڭ مالىمدەمەسىنە قاراعاندا كەلىسسوز وڭاي جۇزەگە اسا سالمايتىنى انىق بولىپ وتىر. كاتار كەلىسسوزدىڭ العىشارتى رەتىندە "بىزگە جاسالعان ءتۇرلى شەكتەۋلەر الىنىپ تاستالسىن" دەگەن تالاپ قويۋدا.

وعان قوسا مينيستر جاسيم ءال-ساني: «ءال-جازيرا» ارناسىنا بايلانىستى ىستەردىڭ ءبارى دە كاتار ەلىنىڭ ىشكى ءىسى بولىپ تابىلادى. سوندىقتان، بۇل تاقىرىپتار كەلىسسوزدە تالقىلانبايدى. كاتارعا جاسالعان قىسىمدى جەڭىلدەتۋ ءۇشىن، «ءال-جازيرانىڭ» بولاشاعى ساۋداعا سالىنبايدى»، – دەدى.

“The Qazaq Times”