2017 جىلدىڭ قاڭتار ايىندا اقش-تىڭ بۇرىنعى پرەزيدەنتى باراك وباما ءوزىنىڭ پرەزيدەنتىك مەرزىمىن اياقتاپ،  اقۇيدەگى ورنىن دونالد ترامپقا تاپسىردى. الايدا ءبىر قىزىعى سول وباما سوڭعى ءجۇز جىل ىشىندە ۆاشينگتوندا ءومىر سۇرۋگە قالعان ءبىرىنشى پرەزيدەنت ەكەن. ەندەشە وباما اقۇيدەن كەتكەن سوڭ قانداي ۇيگە باردى، وعان دەيىنگى پرەزيدەنتتەر قايدا، قانداي ۇيدە تۇرعان؟ انىقتاپ كورەيىك.

باراك وباما

باراك وباما پرەزيدەنت رەزيدەنتسياسىنان كەيىن وتباسىمەن ۆاشينگتونداعى وسى ۇيگە كەلدى

باراك وباما اقۇيدەن كەتكەننەن كەيىن ۆاشينگتوننىڭ كالوراما اۋدانىنان قۇنى 6,3 ملن دوللار تۇراتىن ءزاۋلام ءۇيدى ساتىپ الدى. وبامانىڭ چيكاگودا دا ءۇيى بار. الايدا ولار كىشى قىزدارى ساشا مەكتەپ بىتىرگەنشە وسى ۇيدە تۇرادى.

بۇل ءۇي 1998-2000 جىلدارى بيلل كلينتوننىڭ كەزىندە اقۇيدىڭ ءباسپاسوز قىزمەتشىسى بولعان  دجو لوك­حار­تقا تيەسىلى بولعان.

كىشى دجوردج بۋش

كىشى دجوردج بۋشتىڭ داللاستاعى ءۇيى، تەحاس شتاتى.

كىشى دجوردج بۋش 2009 جىلى پرەزيدەنتتىكتەن كەتكەننەن سوڭ وزىنىڭ وتانى تەحاس شتاتىنا قايتا كەلدى. ول ايەلى لورامەن دال­لا­سا پرە­ستون-حول­لوۋ اۋدانىنىنىڭ دا­ريا-پلەيس كوشەسىندە ورنالاسقان ۇيدە تۇرادى.

بۋش بۇل ءزاۋلىم ءۇيدى 2008 جىلى ساتىپ العان جانە New York Times ۇسىنعان مالىمەتكە سۇيەنسەك، دجوردجدىڭ كابينەتىنىڭ بارلىق جەرىندە ءوزىنىڭ پرەزيدەنت بولعان كەزدەگى سۋرەتتەرى ءىلىنىپ تۇرادى.

بيلل كلينتون

بيلل كلينتوننىڭ ءۇيىنىڭ ۇستىنەن تۇسىرىلگەن سۋرەت.

گوللاندتىق ستيلدە سالىنعان بيلل كلينتون مەن حيللاري كلينتوننىڭ 11 بولمەلى ءزاۋلىم ءۇيى نيۋ-يورك شتاتى، چاپ­پا­ك­ۆا قالاسىندا ورنالاسقان. ولار بۇل ءۇيدى 1999 جىلى 1,7 ملن دوللارعا ساتىپ الادى.

سونداي-اق، كلينتوندار اۋلەتى ءبىراز ۋاقىت بۇرىن كورشى تۇرعان ءۇيدى دە ساتىپ العان. سەبەبى قىزدارى چەلسي وتباسىمەن اتا-اناسىن كورۋگە كەلگەن كەزدە وسى ۇيگە توقتايدى. بۇدان بولەك بيلل مەن حيللاريدىڭ ۆاشينگتوندا جانە اركانزاس شتاتىندا ۇيلەرى بار.

رو­نالد رەي­گان

رو­نالد رەي­گاننىڭ بەل-ەيرداعى ءۇيى

1981-1989 جىلدارى پرەزيدەنت بولعان رو­نالد رەي­گان اقۇيدەن كەتكەن سوڭ قايتىس بولعانعا دەيىن ايەلى نەنسيمەن لوس-ان­دجە­لە­ستەگى بەل-ەير اۋدانىندا تۇرعان. بىرىڭعاي تانىمال ادامدار تۇراتىن بۇل اۋداندا رەيگان اۋلەتى كانتري ستيلىندەگى جالپى اۋماعى 670 شارشى مەتردى قۇرايتىن ۇيدە ءومىر سۇرگەن.

بۇل ءۇيدى 1986 جىلى رەيگانعا دوستارى الىپ بەرەدى. ال وسىدان ءبىر جىل بۇرىن ءزاۋلىم ءۇيدى امەريكالىق بيزنەسمەندەردىڭ ءبىرى 15 ملن دوللارعا ساتىپ العان.

ريچارد نيك­سون

"باتىستاعى اقۇي" اتانعان ريچارد نيكسوننىڭ ءۇيى

ريچارد نيك­سون اقش تاريحىندا پەزيدەنتتىك قىزمەتتى تولىق اياقتاماي وتستاۆكاعا كەتۋگە ءماجبۇر بولعان جالعىز پرازيدەنت. دەگەنمەن ول اقۇيدەن كەتكەن سوڭ قايدا باراتىنىن بىلەتىن ەدى. ول 1969 جىلى كاليفورنيانىڭ وريندج اۋماعىنداعى La Casa Pacifica ءۇيىن ساتىپ العان. كەيىرەۋلەر بۇل جەردى "باتىستاعى اقۇي" دەپ اتايدى ەكەن.

“The Qazaq Times”