ۋكرايناداعى بانكتەردىڭ سانى ەكى ەسەگە قىسقارعان

سوڭعى ءۇش جىلدا ۋكراينادا 90-عا جۋىق بانك جابىلعان دەۋگە بولادى. ەلدىڭ ۇلتتىق بانكىنىڭ مالىمەتىنشە، قازىرگى كەزدە رەسپۋبليكادا قالعان 90 بانك  جۇمىس ىستەپ جاتىر.

"2017 جىلدىڭ باسىندا 96 بانك بولعان، 2016 جىلدىڭ قاڭتارىندا 163 بانك، ال ءۇش جىل بۇرىن 180 بانك جۇمىس ىستەگەن", - دەگەن مالىمەت كەلتىرەدى ۇلتتىق بانك. 

قازىرگى كەزدە جۇمىس ىستەپ جاتقان، ليتسەنزياسى بار 90 بانكتىڭ 38-ىندە شەتەلدىڭ كاپيتالى بار، ونىڭ 5-ءۋى رەسەيلىك كاپيتالعا تاۋەلدى ، 17 بانك 100%-عا شەتەلدىكتەردىكى.

"ۋكراينسكي ۆىبور - پراۆو نارودا" قوعامدىق قورىنا سىلتەمە جاساعان تاسس اقپارات اگەنتتىگى ۇلتتىق بانكتىڭ بۇرىنعى توراعاسى ۆالەريا گونتارەۆانىڭ بانك جۇيەسىن "تازالاۋ" ساياساتى رەكوردتىق شىعىنعا اكەلگەنىن  مالىمدەپ وتىر. "قولدان جاسالعان بانكتى قۇلدىراتۋ جۇمىستارى ەلدىڭ بانك جۇيەسىن السىرەتتى", - دەيدى قور وكىلدەرى.

سونداي-اق، 2016 جىلدان بەرى ۋكرايناداعى تولەم قابىلەتى تومەن بانكتەردىڭ شىعىنى 22,2%-عا نەمەسە 195,658 ملرد گريۆەنگە (شامامەن $7 ملرد) دەيىن كوبەيىپ كەتكەن. بۇعان قوسا ەلدەگى بانك جۇيەسىنىڭ داعدارىسقا ۇشىراۋى مەن
گونتارەۆانىڭ ۇستانعان ساياساتىنا بايلانىستى پروبلەمالى كرەديتتەردىڭ سانى 55,11%-عا دەيىن ۇلعايعان.

“The Qazaq Times”