وپەك مۇنايدى قىسقارتۋ تۋرالى كەلىسىم مەرزىمىن ۇزارتتى

مۇناي ەكسپورتاۋشى ەلدەر ۇيىمى وپەك اقىرى شيكىزات ءوندىرىسىن قىسقارتۋ تۋرالى كەلىسىم مەرزىمىن ۇزارتاتىن بولدى. بۇگىن اۋستريانىڭ ۆەنا قالاسىندا وتكەن وتىرىس بارىسىندا ۇيىمعا مۇشە ەلدەر وسىنداي شەشىم قابىلدادى. بۇل تۋرالى Bloomberg اگەنتتىگى جينالىسقا قاتىسقاندارعا سىلتەمە جاساپ حابارلاپ وتىر. كەلىسىم مەرزىمىن ۇزارتۋدىڭ ماقساتى - مۇناي باعاسىن تۇراقتى قالىپقا كەلتىرۋ. 

ال كارتەلگە مۇشە ەمەس ەلدەرمەن كەلىسسوز كەيىنىرەك  جاسالاتىن بولادى. ايتا كەتەيىك، يراننىڭ مۇناي جونىندەگى ءمينيسترى بيجان نامدار زانگانە كارتەل ءۇشىن باعانىڭ 50-60 دوللار بولۋى ءتيىمدى ەكەنىن مالىمدەگەن.

جينالىسقا قاتىسقان دەلەگاتتاردىڭ سوزىنە سەنسەك، كەلىسىم 2018 جىلدىڭ 31 ناۋرىزىنا دەيىن سوزىلاتىن بولادى.

سونداي-اق، استانا ۋاقىتىمەن 16:40 شاماسىندا Brent ماركالى مۇنايدىڭ باررەلى 53,24 دوللاردى قۇراعان. كورسەتكىش الدىڭى سەسسيادا بەلگىلەنگەن باعادان 1,3 پايىزعا تومەن.

ايتا كەتەيىك، بۇعان دەيىن قازاقستاننىڭ ەنەرگەتيكا ءمينيسترى قانات بوزىمباەۆ قازاقستان مۇناي كولەمىن قىسقارتۋعا قاتىستى وپەك-پەن بولعان كەلىسىم مەرزىمىن ودان ءارى ۇزارتۋعا دايىن ەمەستىگىن مالىمدەگەن. ءمينيستردىڭ سوزىنشە، قازاقستان قارا التىن كولەمىن قىسقارتۋ تۋرالى كەلىسىم اياسىندا بولادى. الايدا شيكىزات ءوندىرىسىن ەندى دامىتىپ جاتقان قاشاعان سياقتى كەن ورنىنىڭ دا مۇمكىندىكتەرى ەسكەرىلۋ قاجەت.

“The Qazaq Times”