ترامپتىڭ بيۋدجەت جوسپارىنا اقش-تىڭ ەكى پارتياسى بىردەي قارسى شىقتى

اقش پرەزيدەنتى دونالد ترامپ  «تەپە-تەڭ فەدەرالدىق مەجە ەسەپ» اتتى ون جىلدىق مەرزىمگە ارنالعان بيۋدجەت جوباسىن ورتاعا قويدى. اتالعان جوبا ۇكىمەتتىڭ قوعامدىق قامسىزداندىرۋ نىساندارى بولگەن قاراجاتتار مەن مەجەلەنگەن مەرزىم ىشىندەگى ەكونوميكالىق وسىمگە يەك ارتادى. جوبا جاريالانىسىمەن،  سەيسەنبى كۇنى دەموكراتتار پارتياسى مەن رەسپۋبليكاشىلدار پارتياسىنىڭ ءبىر ءبولىم مۇشەلەرىنىڭ قارسىلىعىنا ۇشىرادى.

الياسكا شتاتىنداعى رەسپۋبليكاشىلداردىڭ مۇشەسى Don Young:  «جاسىرارى جوق،  بۇل جوبا ىسكە قوسىلماي جاتىپ،  جەڭىلىسكە ۇشىرادى. مەن بۇل بيۋدجەت جوسپارىنىڭ وسى شتاتتاعى ەكى ءىرى نىساندى كۇشىنەن قالدىرۋىن قالامايمىن»، – دەدى.

بۇل جوباعا نەگىزدەلگەندە الداعى ون جىلدا ازىق-تۇلىك بيلەتى $ 193 ملن;  وقۋشىلار نەسيەسى $  143 ملن;  مۇمكىندىگى شەكتەۋلى جاندارعا ارنالعان ارنايى تولەمدەر $ 7, 2 ترلن;  اۋىل شارۋاشىلىق جاردەماقىسى $ 3, 8 ترلن-عا ازايۋى كەرەك ەكەن.

كەنتۋككي شتاتىنداعى رەسپۋبليكاشىلدار وكىلى،  بۇرىنعى وكىلدەر ءۇيىنىڭ بيۋدجەت باسقارۋ كوميتەتىنىڭ توراعاسى حال روگرەس (Hal Rogers) : «اتالعان جوبا ۇساق-تۇيەك پروبلەمالاردى شەشەتىن نارسە ەمەس،  قايتا ول ەكونوميكالىق ءىرى ءوسۋ پروتسەسىنە قىسىم تۇسىرەدى دە،  اقش-تاعى اۋىلدى جەرلەردى كەدەيلىككە ۇشىراتۋى مۇمكىن»، – دەيدى.

كەيبىر ساراپشىلار بۇل ون جىلدىق بيۋدجەت جوباسى ارقىلى جالپى ەكونوميكاداعى ءوسىم بۇرىنعىدان باياۋىراق بولعانىمەن،  مەملەكەتتىك ىشكى كىرىسى ارتىپ،  ۇكىمەتتى قۋاتتى قارجىمەن قامداۋعا،  اسكەري سالاعا بولىنەتىن قارجىنى كوبەيتۋگە بولادى دەيدى. قازىنالىق ىستەردىڭ قانداي دا ءبىر زاڭدىلىقتارىن جىلىگىن شاعىپ، مايىن ىشكەن امەريكالىق مامانداردىڭ ءاربىر بولجامى ترامپتىڭ اسىعىس شەشىمدەرىنە دەم بەرۋى،  ءتىپتى،  ونىڭ جوسپارلارىن قايتادان ءتۇزىپ شىعۋى مۇمكىن.

ترامپتىڭ ايتقان ءاربىر سوزدەرى مەن اتقارۋ الدىندا تۇرعان ساياسي ويلارى،  ەكونوميكالىق جوبالارى اقش-تىڭ ەل ىشىندە دە،  حالىقارالىق قىزعىن تاقىرىپقا اينالىپ وتىر. پرەزيدەنتتەرىنىڭ ايتقانىن بۇلجىتپاي ورىنداۋعا ادەتتەنبەگەن امەريكالىقتار، ەل تاعدىرى مەن مۇددەسىنە ساياتىن ءاربىر قادامعا ساقتىقپەن،  سابىرمەن باراتىنى انىق.

“The Qazaq Times”