رەسەي اقش-قا كەتكەن ەسەسىن قايىرماق

2016 جىلعى اقش پرەزيدەنت سايلاۋىنا رەسەيدىڭ ارالاسقانى ءۇشىن، سول كەزدەگى اقش پرەزيدەنتى باراك وباما اقش-تا تۇراتىن رەسەيلىك ديپلوماتيالىق ءىس ورىندارىن تاركىلەپ، ديپلومات وكىلدەرىن قۋدالاعان ەدى. جاقىندا كرەمل اقۇيدەن وسى ديپلوماتيا كوزدەرىن قايتا ىسكە قوسۋىن تالاپ ەتكەن بولاتىن. الايدا، بۇل تالابى اقش تارابىنان تويتارىسقا ۇشىرادى. سوعان بايلانىستى، ەندى ماسكەۋ تارابى دا رەسەيدەگى اقش ديپلوماتتار سانىن قىسقارتۋعا شەشىم قابىلدادى.

«پارس.اقپارات»-تىڭ حابارلاۋىنشا، كرەملدىڭ بۇل شەشىمى سارسەنبى كۇنگى رەسەي سىرتقى ىستەر ءمينيسترىنىڭ اقش مەملەكەتتىك حاتشىسىمەن كەزدەسۋىنەن كەيىن جاسالىپ وتىر. دەمەك، سەرگەي لاۆروۆ پەن تيللەرسون اراسىنداعى كەزدەسۋ ويداعىداي بولماعان. رەسەيلىك ءبىر ديپلوماتتىڭ راستاۋىنشا، رەسەي جاقتىڭ امەريكالىق ديپلوماتتار سانىن قىسقارتۋى،  باراك وباما تۇسىندا كۇشىن جويعان رەسەيلىك ديپلوماتيا كەشەندەرىنىڭ قايتالاي ىسكە قوسىلماۋىنا بايلانىستى ماسكەۋدىڭ بەرگەن رەاكتسياسى ەكەن.

ەستەرىڭىزگە سالا كەتەيىك، باراك وباما پرەزيدەنتتىك وكىلەتتىلىگىنىڭ سوڭعى كۇندەرى «رەسەي جاق اقش-تىڭ دەموكراتيالى پرەزيدەنت سايلاۋ ىسىنە ارالاستى» دەپ ايىپتاپ ۋاشينگتون جانە سان-فرانتسيسكو قالالارىنداعى 35 رەسەيلىك ەلشىنى قۋالاعان ەدى. سونداي-اق، رەسەيدىڭ اقش-تاعى ەكى ديپلوماتيالىق قىزمەتتەرگە ارنالعان جۇمىس عيماراتىن تاركىلەگەن بولاتىن.

“The Qazaq Times”