رەسەي ءرۋبلى السىرەۋى مۇمكىن

رەسەي فەدەراتسياسىنىڭ ەكونوميكالىق دامۋ ءمينيسترى ماكسيم ورەشكين "روسسيا24" تەلەارناسىنا بەرگەن سۇحباتىندا يمپورت كولەمى ارتقان جاعدايدا جاز مەزگىلىندە ءرۋبلدىڭ السىرەۋى مۇمكىن ەكەنىن ايتادى. 

"الىس شەتەلدەن كەلەتىن يمپورتتىق تاۋارلاردىڭ كولەمى جىل باسىنان بەرى 20–25%-دى قۇرادى. ەگەر بۇل كورسەتكىش جاز ايلارىندا دا ساقتالاتىن بولسا شوتتا تاپشىلىق پايدا بولادى. ارينە مۇنداي جاعدايدان كەيىن رۋبل قۇنىنىڭ جوعارى بولۋى ەكىتالاي", - دەيدى مينيستر.

ول قازىرگى كەزدە رەسەيدىڭ اكتيۆتەر قاتارىنا شەتەلدىك كاپيتال قوسىلىپ جاتقاندىقتان رۋبل نىعايىپ جاتقانىن اتاپ ءوتتى. ال بۇدان بۇرىن ول مەزگىلدىك فاكتورلارعا قاتىستى تولەم بالانسىنىڭ ناشارلاۋى سالدارىنان 2017 جىلدىڭ ەكىنشى جانە ءۇشىنشى توقسانىندا رەسەيلىك ۆاليۋتانىڭ السىرەۋى مۇمكىن ەكەنىن ەسكەرتكەن.

رەسەيدىڭ ەكونوميكالىق دامۋ مينيسترلىگىنىڭ بولجاۋىنشا، الداعى ايلاردا ءرۋبلدىڭ 1 دوللارعا شاققانداعى قۇنى 63-64 رۋبل شاماسىندا، ال 2018 جىلى 70,8 رۋبل شاماسىندا بولادى.

ال قازاقستان مەن رەسەي ەكونوميكاسىنىڭ تىعىز بايلانىستا ەكەنىن ەسكەرسەك، بۇل ەلىمىزدىڭ ۇلتتىق ۆاليۋتاسىنا اسەر ەتۋى عاجاپ ەمەس. دەگەنمەن، وتكەن اپتادا قازاقستان دامۋ بانكىنىڭ باسقارما توراعاسى بولات جامىشەۆ "تەڭگە باعامى قازىر نىڭايىپ كەلەدى، سوندىقتان باعام كۇرت وزگەرىپ كەتەدى دەپ ويلامايمىن. دەۆالۆاتسيانىڭ بەلگىلى ءبىر كەزەڭى بولۋى مۇمكىن، دەسەك تە وڭ ديناميكانى قۇلدىراتاتىن «مينا» بار دەپ ەسەپتەمەيمىن" دەپ پىكىر بىلدىرگەن ەدى.

“The Qazaq Times”