Qandı Qañtar: 16 jılğa sottalğan Jwmanovtıñ apellyaciyalıq sotı bastaldı

Tarazda Qañtar oqiğası boyınşa 16 jılğa sottalğan Erbol Jwmanovtıñ apellyaciyalıq sotı bastaldı. İste Jwmanovtan özge bes azamat – Aybol Sağıntay, Nwrahan Mahatov, Jaqsılıq Abdullaev, Däuren Nwraliev jäne Qanat Nwrahanwlı bar.

İsti Jambıl oblıstıq qılmıstıq ister jönindegi apellyaciyalıq sot alqasınıñ sud'yaları Abidov N.M,  Nwrlıqwlov G.K jäne Tölesbay S.N qarauda.

Sottaluşılar – Erbol Jwmanov, Aybol Sağıntay, Nwrahan Mahatov, Jaqsılıq Abdullaevtıñ eşqaysısı sot zalına jetkizilmedi. Advokat Jalğas Saparhanova men Abdulqasımov qamaudağı Erbol Jwmanov pen Nwrahan Mahatovtı sot zalına jetkiziluin talap etti. Özge advokattar da ötinişti qoldadı. Biraq sud'ya Abidov ötinişti qanağattandırmadı.

Erbol Jwmanovtıñ ağası Erjan Jwmanov aldağı uaqıtta ötiniş-talaptarı orındalmasa sud'yağa senimsizdik (otvod) bildiretinin ayttı.

Prokuratura tömengi sot instanciyasınıñ ükimi boyınşa jazasın tolıq öteuine baylanıstı sot zalınan bosatılğan Däuren Nwraliev pen Qanat Nwrahanwlınıñ jazasın auırlatudı swrap, sotqa qarsılıq ötiniş hatın tüsirgen.

Erjan Jwmanov apellcyaciyalıq sottıñ da tüsiniksiz ötip jatqanın ayttı. Onıñ sözinşe, inisi Erbol Jwmanovtıñ şağımdarı qarausız qaluda.

– Sottaluşılardı mına sotqa qatıstırmay otır. Nege ekenin bilmeymin. İnimniñ abaqtıda otırğanına 17 ay boldı. Öziniñ qarsılığın bildirip otır. Janayqayın jetkize almay jatır. Aytpağan jeri qalmadı. Ädildik bar ma özi bizde. Zañ jüre me, jürmey me tüsiniksiz bolıp jatır. Özine qol jwmsap jatır. Eşqanday äreket jasamay jatır. Sot zalına alıp kelip, sottaluşılardıñ özderi qatıssa, öytkeni solardıñ tağdırı şeşilip jatır, – dedi Erjan Jwmanov.

N67 tergeu izolyatorında jatqan Erbol Jwmanov bwğan deyin jasalıp jatqan qısım men ädiletsiz sot şeşimine qarsılıq bildirip, öz-özine qol jwmsap, işin tilgen. Erjan Jwmanovtıñ sözinşe, tergeude müdde qayşılığı bar. Sol sebepti de tergeu tarapı qorıqqannan sottaluşılardı proceske qatıstırmauda.

– Olar qorqadı dep oylaymın. Bılıqtıñ barlığı şığıp kete me deydi. Barlığın jasırıp otır. Wlttıq qauipsizdik komiteti iste özi jäbirlenuşi bola twra, özi tergegen. İsti bwrmalau qoldarında twr, – dedi ol.

Advokat Jalğas Saparhanova tergeu tolıqqandı jürgizilmey sotqa berilgenin jäne soğan qaramastan birinşi satıdağı sot ükim şığarğanın ayttı.

– Oqiğa bolğan jer tolıq zerttelmegen. Tergep-tekseru organımen tergeu äreketteri tolığımen jürgizilmegen. Bwl jerde QR Qılmıstıq-procestik kodeksiniñ 24-babınıñ normaları bwzılsa da, is birinşi satılı sotqa berilgen. Birinşi satılı sot bwğan köz jwma qarap, zañsız, negizsiz sot ükimi şıqqan. YAğni atalğan sot ükimine apellyaciyalıq şağım berip otırmız. Qazir tergeu izolyatorında otırğan tört azamattıñ birde-bireuin sotqa aldırtqan joq. Bizdiñ osığan baylanıstı ötinişimizdi qanağattandırğan joq, – dedi advokat.

Sotta Jalğas Saparhanova sot alqasına birneşe ötiniş hat tüsirdi. Onıñ işinde tergeuşiler nazarınan tıs qalıp qoyğan, oqiğa ornınan alınğan oq därilerdi iske tirkeu, iste tirkelgen videoğa beyne-tehnikalıq saraptama jasau, telefonğa jasalğan detal'izaciyanı qayta jasau siyaqtı talap-ötinişter bar.

Erbol Jwmanovtıñ ağası Erjan Jwmanov birinşi satıdağı sot kezinde de iske tirkelgen video montajdalğanın, beynede körsetilgen uaqıttar ärtürli ekenin aytqan. Biraq sot onı qarausız qaldırğan.

28 säuirde sud'ya Qadirbek Nwrjan Erbol Jwmanovtı 16 jılğa, Nwrahan Mahatov pen Aybol Sağıntaydı 6 jılğa, Jaqsılıq Abdullaevtı 5 jılğa bas bostandığınan ayıru jazasına kesip, Qanat Nwrahanwlı, Ermahan Saylauov, Däuren Nwräliev, Dosmwhammed Sadıqov jäne Salamat Qosanovtı raqımşılıq zañın paydalanıp, sot zalınan bosatqan.

Sud'ya ükim oqıp jatqan uaqıtta Erbol Jwmanov narazılıq bildirip, tağılğan ayıppen, şığarılğan ükimmen kelispeytinin, qısım körip, soqqıdan qabırğası sınğanın aytqan.

– Türmede öluim kerek bolsa dayınmın. Tek mına bassızdıq toqtasın. Qinap jatır, wrıp jatır, qanşa qabırğamdı sındırdı. Sonıñ bireuin aytpay otırmız… Bwlarğa qan kerek. Bwl jolı bir-eki adam ketermiz. Kelesi jolı bwlar qanşa adamdı sottaydı. Toqtamaydı bwlar, – dedi ol.