قاندى قاڭتار: 16 جىلعا سوتتالعان جۇمانوۆتىڭ اپەللياتسيالىق سوتى باستالدى

تارازدا قاڭتار وقيعاسى بويىنشا 16 جىلعا سوتتالعان ەربول جۇمانوۆتىڭ اپەللياتسيالىق سوتى باستالدى. ىستە جۇمانوۆتان وزگە بەس ازامات – ايبول ساعىنتاي، نۇراحان ماحاتوۆ، جاقسىلىق ابدۋللاەۆ، داۋرەن نۇراليەۆ جانە قانات نۇراحانۇلى بار.

ءىستى جامبىل وبلىستىق قىلمىستىق ىستەر جونىندەگى اپەللياتسيالىق سوت القاسىنىڭ سۋديالارى ابيدوۆ ن.م،  نۇرلىقۇلوۆ گ.ك جانە تولەسباي س.ن قاراۋدا.

سوتتالۋشىلار – ەربول جۇمانوۆ، ايبول ساعىنتاي، نۇراحان ماحاتوۆ، جاقسىلىق ابدۋللاەۆتىڭ ەشقايسىسى سوت زالىنا جەتكىزىلمەدى. ادۆوكات جالعاس ساپارحانوۆا مەن ابدۋلقاسىموۆ قاماۋداعى ەربول جۇمانوۆ پەن نۇراحان ماحاتوۆتى سوت زالىنا جەتكىزىلۋىن تالاپ ەتتى. وزگە ادۆوكاتتار دا ءوتىنىشتى قولدادى. بىراق سۋديا ابيدوۆ ءوتىنىشتى قاناعاتتاندىرمادى.

ەربول جۇمانوۆتىڭ اعاسى ەرجان جۇمانوۆ الداعى ۋاقىتتا ءوتىنىش-تالاپتارى ورىندالماسا سۋدياعا سەنىمسىزدىك (وتۆود) بىلدىرەتىنىن ايتتى.

پروكۋراتۋرا تومەنگى سوت ينستانتسياسىنىڭ ۇكىمى بويىنشا جازاسىن تولىق وتەۋىنە بايلانىستى سوت زالىنان بوساتىلعان داۋرەن نۇراليەۆ پەن قانات نۇراحانۇلىنىڭ جازاسىن اۋىرلاتۋدى سۇراپ، سوتقا قارسىلىق ءوتىنىش حاتىن تۇسىرگەن.

ەرجان جۇمانوۆ اپەللتسياتسيالىق سوتتىڭ دا تۇسىنىكسىز ءوتىپ جاتقانىن ايتتى. ونىڭ سوزىنشە، ءىنىسى ەربول جۇمانوۆتىڭ شاعىمدارى قاراۋسىز قالۋدا.

– سوتتالۋشىلاردى مىنا سوتقا قاتىستىرماي وتىر. نەگە ەكەنىن بىلمەيمىن. ءىنىمنىڭ اباقتىدا وتىرعانىنا 17 اي بولدى. ءوزىنىڭ قارسىلىعىن ءبىلدىرىپ وتىر. جانايقايىن جەتكىزە الماي جاتىر. ايتپاعان جەرى قالمادى. ادىلدىك بار ما ءوزى بىزدە. زاڭ جۇرە مە، جۇرمەي مە تۇسىنىكسىز بولىپ جاتىر. وزىنە قول جۇمساپ جاتىر. ەشقانداي ارەكەت جاساماي جاتىر. سوت زالىنا الىپ كەلىپ، سوتتالۋشىلاردىڭ وزدەرى قاتىسسا، ويتكەنى سولاردىڭ تاعدىرى شەشىلىپ جاتىر، – دەدى ەرجان جۇمانوۆ.

N67 تەرگەۋ يزولياتورىندا جاتقان ەربول جۇمانوۆ بۇعان دەيىن جاسالىپ جاتقان قىسىم مەن ادىلەتسىز سوت شەشىمىنە قارسىلىق ءبىلدىرىپ، ءوز-وزىنە قول جۇمساپ، ءىشىن تىلگەن. ەرجان جۇمانوۆتىڭ سوزىنشە، تەرگەۋدە مۇددە قايشىلىعى بار. سول سەبەپتى دە تەرگەۋ تاراپى قورىققاننان سوتتالۋشىلاردى پروتسەسكە قاتىستىرماۋدا.

– ولار قورقادى دەپ ويلايمىن. بىلىقتىڭ بارلىعى شىعىپ كەتە مە دەيدى. بارلىعىن جاسىرىپ وتىر. ۇلتتىق قاۋىپسىزدىك كوميتەتى ىستە ءوزى جابىرلەنۋشى بولا تۇرا، ءوزى تەرگەگەن. ءىستى بۇرمالاۋ قولدارىندا تۇر، – دەدى ول.

ادۆوكات جالعاس ساپارحانوۆا تەرگەۋ تولىققاندى جۇرگىزىلمەي سوتقا بەرىلگەنىن جانە سوعان قاراماستان ءبىرىنشى ساتىداعى سوت ۇكىم شىعارعانىن ايتتى.

– وقيعا بولعان جەر تولىق زەرتتەلمەگەن. تەرگەپ-تەكسەرۋ ورگانىمەن تەرگەۋ ارەكەتتەرى تولىعىمەن جۇرگىزىلمەگەن. بۇل جەردە قر قىلمىستىق-پروتسەستىك كودەكسىنىڭ 24-بابىنىڭ نورمالارى بۇزىلسا دا، ءىس ءبىرىنشى ساتىلى سوتقا بەرىلگەن. ءبىرىنشى ساتىلى سوت بۇعان كوز جۇما قاراپ، زاڭسىز، نەگىزسىز سوت ۇكىمى شىققان. ياعني اتالعان سوت ۇكىمىنە اپەللياتسيالىق شاعىم بەرىپ وتىرمىز. قازىر تەرگەۋ يزولياتورىندا وتىرعان ءتورت ازاماتتىڭ بىردە-بىرەۋىن سوتقا الدىرتقان جوق. ءبىزدىڭ وسىعان بايلانىستى ءوتىنىشىمىزدى قاناعاتتاندىرعان جوق، – دەدى ادۆوكات.

سوتتا جالعاس ساپارحانوۆا سوت القاسىنا بىرنەشە ءوتىنىش حات ءتۇسىردى. ونىڭ ىشىندە تەرگەۋشىلەر نازارىنان تىس قالىپ قويعان، وقيعا ورنىنان الىنعان وق دارىلەردى ىسكە تىركەۋ، ىستە تىركەلگەن ۆيدەوعا بەينە-تەحنيكالىق ساراپتاما جاساۋ، تەلەفونعا جاسالعان دەتاليزاتسيانى قايتا جاساۋ سياقتى تالاپ-وتىنىشتەر بار.

ەربول جۇمانوۆتىڭ اعاسى ەرجان جۇمانوۆ ءبىرىنشى ساتىداعى سوت كەزىندە دە ىسكە تىركەلگەن ۆيدەو مونتاجدالعانىن، بەينەدە كورسەتىلگەن ۋاقىتتار ءارتۇرلى ەكەنىن ايتقان. بىراق سوت ونى قاراۋسىز قالدىرعان.

28 ساۋىردە سۋديا قادىربەك نۇرجان ەربول جۇمانوۆتى 16 جىلعا، نۇراحان ماحاتوۆ پەن ايبول ساعىنتايدى 6 جىلعا، جاقسىلىق ابدۋللاەۆتى 5 جىلعا باس بوستاندىعىنان ايىرۋ جازاسىنا كەسىپ، قانات نۇراحانۇلى، ەرماحان سايلاۋوۆ، داۋرەن نۇراليەۆ، دوسمۇحاممەد سادىقوۆ جانە سالامات قوسانوۆتى راقىمشىلىق زاڭىن پايدالانىپ، سوت زالىنان بوساتقان.

سۋديا ۇكىم وقىپ جاتقان ۋاقىتتا ەربول جۇمانوۆ نارازىلىق ءبىلدىرىپ، تاعىلعان ايىپپەن، شىعارىلعان ۇكىممەن كەلىسپەيتىنىن، قىسىم كورىپ، سوققىدان قابىرعاسى سىنعانىن ايتقان.

– تۇرمەدە ءولۋىم كەرەك بولسا دايىنمىن. تەك مىنا باسسىزدىق توقتاسىن. قيناپ جاتىر، ۇرىپ جاتىر، قانشا قابىرعامدى سىندىردى. سونىڭ بىرەۋىن ايتپاي وتىرمىز… بۇلارعا قان كەرەك. بۇل جولى ءبىر-ەكى ادام كەتەرمىز. كەلەسى جولى بۇلار قانشا ادامدى سوتتايدى. توقتامايدى بۇلار، – دەدى ول.