Prezident Qasım-Jomart Toqaev «jappay tärtipsizdikke şaqırğandarğa» jazanı küşeytetin tüzetulerge qol qoydı. Bwl jöninde «Azattıq» radiosı habarladı. 

Qwjattıñ tolıq atauı – «Qılmıstıq sot isin jürgizu, jaza atqaru salasındağı adam qwqıqtarı, sonımen birge azaptaulardıñ jäne basqa da qatıgez, adamgerşilikke jatpaytın nemese ar-namıstı qorlaytın is-äreketterdiñ aldın alu mäseleleri boyınşa QR keybir zañnamalıq aktilerine özgerister men tolıqtırudar engizu turalı».

Qwjat «jappay tärtipsizdikke şaqıru» babı (272-bap, 1-böligi) boyınşa jazanı 3 jıldan 5 jılğa, telekommunikaciya jelilerin paydalanu arqılı jasalğan qılmıs jazasın 3 jıldan 7 jılğa deyin köbeytudi wsınadı. Qılmıstıq top qwramında jasalğan bwzaqılıq üşin jazanı 5 jıldan 7 jılğa köbeytudi wsınadı. Endi bwl bap boyınşa ayıptalğan adamdar şarttı türde merziminen bwrın bosatu mümkindiginen ayırıladı.

Bwğan qosa, Qılmıstıq kodekstegi «azaptau» babına «adamgerşilikke jatpaytın nemese ar-namıstı qorlaytın is-äreketi üşin» degen qwqıqbwzuşılıqtıñ jaña qwramı engiziledi. Zañ jobası avtorlarınıñ tüsindiruinşe, «bwl azaptaudı qatıgezdikten ajıratuğa, zañnamadağı olqılıqtardı joyuğa mümkindik beredi».

Zañ sonımen birge twrmıstıq zorlıq-zombılıq üşin jauapkerşilikti de küşeytedi. Atap aytqanda, Qılmıstıq kodekstegi 106 («Densaulıqqa qasaqana auır ziyan keltiru») jäne 107-baptarı («Densaulıqqa qasaqana auırlığı ortaşa ziyan keltiru») boyınşa jauapkerşilik küşeytiledi.

Qazaqstanda «jappay tärtipsizdikke» şaqırğandarğa jazanı qataytu keminde 238 adam qaza bolğan Qañtar oqiğasınan keyin wsınılıp otır. Resmi mälimet boyınşa, Qandı Qañtarğa baylanıstı jüzdegen adam «jappay tärtipsizdik» boyınşa ayıptalıp, olarğa ükim şıqqan. Arasında azamattıq belsendiler de bar.

Tergeu kezinde keybir ayıptaluşılar is «birjaqtı tergelgenin» aytqan. Qwqıq qorğauşılar men belsendiler Qañtar oqiğası jan-jaqtı, ädil tergelmedi, «beybit narazılıqqa şıqqandarğa bilik negizsiz oq attı, beybit miting men bülikti biriktirip qarastıruğa talpındı» dep esepteydi. Bilik halıqaralıq wyımdardıñ oqiğanı memleket auqımınan keñ därejede tergeu turalı wsınısın keri qaytarğan.