Jurnalistiñ sözinşe, oqiğa tüngi sağat 3-te bolğan. Boreykonıñ körşileri esikti jelimdep, pod'ezd esigin boyap ketkender üş adam bolğanın körgen. Biraq olar qaşıp ketken. Bwl turalı Masa media jazdı.

– Jelimde janğış zattıñ iisi bar. Esikti bitep, sosın örtegisi kelgen siyaqtı. «102-ge» habarlastım. Jurnalist ekenimdi, oqiğanı käsibi qızmetimmen baylanıstıratınımdı ayttım. Habarlamanı qabıldap, Bostandıq audandıq policiya basqarmasına jetkizgenin ayttı, – dep jazdı jurnalist telegram arnasına.

Boreykonıñ aytuınşa, oqiğa ornına Bostandıq audandıq policiyasınan Nwrlan Nwrqasımov bastağan jedel top kelip, esikten sausaq izderin alğan. Ol özimen bolğan jağdaydı «jurnalisterdi qorqıtu akciyasınıñ jalğası» dep esepteydi. Boreyko Dinara Egeubaeva, Güljan Erğalieva, Gülnar Bajkenova, Samal Ibraevağa jasalğan qısımdar bir ortalıqtan wyımdastırılğan dep topşılaydı.

Bir kün bwrın Ulysmedia.kz saytınıñ bas redaktorı Samal Ibraeva sayttıñ bwzılğanın jäne onıñ alğaşqı betine öziniñ jäne otbasınıñ qwjattarı jariyalanıp ketkenin mälimdegen. Jurnalist oqiğanı «jeke ömirine qol swğu» dep bağalap, policiyağa arız tüsiretinin mälimdegen. Äleumettik jelilerde jurnalistke bağıttalğan qoqan-loqı sipatındağı kommentariylerdiñ tarağanı belgili boldı.

Aqparat jäne qoğamdıq damu ministri Darhan Qıdıräli vedomstvo tiisti organdarmen aqparattıq şabuıldı tekseretinin mälimdedi.