Qañtar oqiğası kezinde wlınan ayırılğan öskemendik Araylım Sağatbaevanıñ «sömkesinen äuejayda oq tabıluına» baylanıstı qozğalğan is «patron işinde jarılğış zat bolmağandıqtan» jabıldı. Bwl jöninde «Azattıq» radiosı habarladı.

– Tergeuşi mağan «patronnıñ adam ömirine qaupi joq dep tanıldı, sondıqtan isti toqtattıq» dedi. Ballistikalıq saraptama qorıtındısında patron işinde oq-däri bolmağanı anıqtalğan eken, – deydi Sağatbaeva.

Onıñ aytuınşa, tergeuşiler «oqtı sömkege salıp jiberui mümkin» dep äuejaydağı qızmetkerlerdiñ birinen küdiktenedi. Biraq olar küdiktini Sağatbaevanıñ arnayı şağımınsız izdemeytinderin aytqan.

– Tergeuşiniñ sözine qarağanda, äuejaydıñ bir qızmetkeri meniñ sömkemniñ aldıñğı qaltası ornalasqan twstı birneşe sekundtay wstap twrğanı beynetaspağa jazılğan. Biraq nelikten sömkeni wstağanı tiyanaqtı tekserilmegen. Mwnı bilu üşin tağı şağım beruim kerek eken. Erteñ, 29 qaraşada ŞQO policiya departamenti nemese oblıstıq prokuraturağa şağım tüsiremin. Mağan kim, nelikten qastandıq istemek bolğanın bilgim keledi. Sonımen birge wşaqqa alğan biletimniñ aqşası küyip ketip, qaytarılmadı, oğan kim jauap beredi? Moral'dıq jäne materialdıq ötemaqı talap etemin, – dedi Sağatbaeva.

Sonımen birge Araylım Sağatbaeva osı oqiğadan keyin äldekimder ekinşi balası turalı aqparat swrastırğanın, onıñ jäne öziniñ qauipsizdigine alañdaytının ayttı.

– Meni 16 qaraşada äuejayda wstağan künniñ erteñinde ekinşi wlımnıñ jwmıs orınına belgisiz adamdar barıp, qızmettesterinen ol turalı swraptı. Sol küni wlım demalısta bolatın. Qazir onıñ qauipsizdigine alañdap jürmin. Meni qorqıtqıları kele me, älde basqa közdegenderi bar ma, bwl adamdardıñ wlımda nesi bar eken? Balam öte tärtipti, jwmısınan keşikpeydi, şaqırğan uaqıtında barıp jüredi. «Jaman aytpay jaqsı joq», onıñ qauipsiz bolğanın qalaymın, – dedi Sağatbaeva.

Araylım Sağatbaevanıñ ülken wlı Quanış Qabılhanov Öskemende Qañtar oqiğası kezinde oq tiip qaza tapqan. Wlınıñ qazası boyınşa qozğalğan is uaqıtşa toqtatılğan jäne Öskemenniñ mamandandırılğan tergeu sotı onıñ şağımın qanağattandırmağanın habarlap, 14 qaraşada qolına qaulı bergen.

Anası isti jalğastıru üşin 16 qaraşada Astanağa joğarğı sotqa barmaq bolğanda keden qızmetkerleri Öskemen äuejayında onı wstap alıp qaldı.

Qauipsizdik qızmetkerleri onıñ sömkesinen «oq tabılğanın» habarlağan. Sağatbaevanı policiyada tört sağattay wstap, üyine jibergen. Sağatbaeva mwnı «ädeyi wyımdastırılğan boluı mümkin» deydi. Ol wstalğannan keyin «eşqayda şığa almay», appelyaciyalıq şağımdı 18 qaraşada advokatı arqılı onlayn ötkizgen.

Qañtar oqiğası kezinde Öskemende oqqa wşıp, mert bolğan üş azamattıñ biri Quanış Qabılhanovtıñ artında äyeli men bir jastağı qızı qaldı. Araylım Sağatbaeva wlınıñ ölimine kinälilerdi tabudı swrap, jergilikti äkimdikke, Almatı men Astana qalalarına da barğan äri prezidenttiñ qabıldauına da jazılğan. Prezident äkimşiligi «prezident Qasım-Jomart Toqaev qazir jeltoqsan ayında jazılğan adamdardı qabıldap jatır» dep kezek kütuin swrağan.