Foto: AFP

Süriyalıq aqparat qwraldarı Asad küşteriniñ reseylik äskerileri kömegimen qalağa kirip, qala ortalığındağı alañğa el bayrağın tikti dep habarlaydı.

Oppoziciya küşteri qaruların tastap, raqımşılıqqa kepildik berilgen jağdayda eldiñ soltüstigine ketuge kelisken. 19 mausımnan bastap ükimettik küşter Dera qalasınıñ mañayındağı auqımdı territoriyanı öziniñ baqılauına alğan. BWW-nıñ mälimetine qarağanda, qaqtığıstıñ saldarınan 234 mıñ adam bosqınğa aynalıp, olardıñ 70%-ı Izrail' tarapınan basıp alınğan Golan şıñdarımen qatar ornalasqan Kuneytra qalasına bas sauğalağan. Al, Iordaniya şekarasındağı on mıñdağan bosqın mausım ayınıñ basında Dera mañayındağı oppoziciya küşteri qaruların tastap, Şam (Damask) baqılauına ötuge keliskennen keyin öz üylerine oralğan.

Biliktiñ Şamğa ötui nelikten mañızdı?

Atalğan qalanıñ strategiyalıq äri simvoldıq mañızı öte ülken. Osı mañızdı qala Iordaniyamen aradağı bastı şekaralıq nısanğa tikeley jaqın ornalasqan. Sonımen qatar, däl osı jerde 2011 jılı Asad rejimine qarsı köterilis bastalğan edi.

Sol kezdegi qarsılıq şaraları bilik mektep qabırğalarına ükimetke qarsı jazular jazğan birneşe jetkinşekti twtqındağannan keyin bastalğan edi. Bwl sol kezderi «Arab köktemi» degen atau alğan körşi elderdegi revolyuciyamen twspa-tws boldı. Bilik qarsılıq şarasına şığuşılarğa qarsı atıs qaruın qoldanğannan keyin bükil el aumağında Asadtıñ bilik basınan ketuin talap etken qarsılıq şaraları twtandı. Köteriliske şığuşılardıñ sanı kün sayın artıp, al biliktiñ olarğa qarsı qoldanğan ayla-täsilderi asa qatañ jağdayğa jetti. Oppoziciya küşteri qaruğa jügindi. Bastapqıda bilik tarapınan jaudırılğan oqtan qorğanu üşin qarulanğanmen, keyin qaru olarğa el territoriyasın baqılauğa alu üşin kerek boldı. Nätijesinde, keyin azamattıq soğısqa wlasqan osı soyqannıñ saldarınan 350 mıñnan astam adam qaza tauıp, 11 mln adam bosqınğa aynaldı.

Qarulı oppoziciya nelikten Dera qalasında berildi?

Süriyanıñ oñtüstik-batısı soñğı jılda edäuir sayabırsıp, osınıñ nätijesinde qauipsiz aymaq turalı kelisimşart jasaldı. Bwğan oppoziciyağa qoldau körsetuşi AQŞ pen Iordaniya jäne Asad rejiminiñ odaqtası Resey qatıstı. Alayda, 2018 jıldıñ kökteminde Şam töñireginde ornalasqan Şığıs Gutadağı oppoziciyanı jeñgenmen, Asad eldiñ qalğan territoriyasınıñ bärin tikeley öz baqılauına aludı şeşti. Reseylik aviaciya tarapınan qoldau tabuşı ükimettik küşter men odaqtas elderdiñ äskerileri üş apta bwrın şabuıldar bastap, oppoziciya territoriyasına tez arada işkeriley berdi.  Zımıran soqqıları men zeñbirekter qarulı oppoziciya küşterin älsiretti. Bwl jolı AQŞ olarğa äskeri türde qoldau körsetpedi. Endi, Iordaniya men Izrail' bilikteri mıñdağan bosqındarğa şekaraların aşqan kezde, BWW gumanitarlıq dağdarıs qaupi turalı eskertu jasauda. Wyım lagerlerdegi ömirdiñ öte naşar ekenin, köptegen adamdardıñ as-susız, aşıq aspan astında lajsız kün körip jatqandarın jariyalap otır.

 “The Qazaq Times”