Foto: lemonde.fr

Resmi äri naqtı mälimet boyınşa, 2018 jıldıñ 1 qañtarınan bastap Süriyadan 920 mıñ adam eriksiz türde baspanaların tastap, özge elderge bas sauğalauğa mäjbür bolğan. Bwl turalı Birikken Wlttar Wyımınıñ (BWW) Süriya dağdarısı jönindegi aymaqtıq üylestiruşisi Panos Mumcis Jenevadağı ştab-päterinde habarlağan.  

Onıñ aytuınşa, bwl — Süriyada 2011 jılı azamattıq soğıs bastalğannan bergi eñ joğarğı körsetkiş. Mumcis, sonımen qatar, soñğı aylarda Süriyada işki qonıs audaruşılar sanı edäuir deñgeyde artqanın habarladı. Ol eger osı jağday odan äri de jalğasa beretin bolsa, äli 2,5 mln beybit twrğın öz qonıstarın tastap ketuge mäjbür bolatının aytıp, alañdauşılığın bildirgen. Ol onday jağdayda, bosqındardıñ köpşiligi Türkiyamen şekarağa bet alatının da ayttı.

Süriyadağı soğıstıñ 2011 jıldıñ naurız ayında bastalğanı belgili. Äskeriler köterilisşilerge oq jaudırğannan keyin beybit qarsılıq şeruleri birden qarulı qaqtığısqa wlasqan edi. BWW-nıñ mälimetinşe, osı soğıs saldarınan büginge deyin 400 mıñnan astam adam qaza tauıp, şamamen 10 million süriyalıq üylerin tastap ketuge mäjbür bolğan. Al, 4,8 million adam özge elderden bassauğa tapqan.

Al, soñğı kelip tüsken mälimetterge qarağanda, 8 jäne 11 mausım aralığında Süriyanıñ Idlib qalasına qarastı auılğa jasalğan äue şabuılınıñ saldarınan 13 büldirşin qaza tapqan. Bwl turalı YUNISEF wyımınıñ Tayau Şığıs pen Soltüstik Afrikadağı aymaqtıq direktorı Geert Kaaeler mälimdedi. Onıñ sözinşe, äue şabuıldarı negizinen Zerden, Fua jäne Kefrey aymaqtarına jasalğan.

“The Qazaq Times”