Foto: aljazeera.com

Saud Arabiyası  Yemendegi Hauti basqınşılar tobı tarapınan Er-Riyadqa qarsı atılğan ballistikalıq zımırannıñ artında Iran twrğanına senimdi. Ol Tehrannıñ bwl äreketin "soğıs qimıldarınıñ körinisi" dep tauıp, Iran BWW Qauipsizdik Keñesiniñ Yemendegi toptarğa qaru tasımaldauğa tıyım salatın №2216 rezolyuciyasın bwzdı dep habarladı. Bwl turalı Äl-Jazira aqparattıq agenttigi jazdı. 

Bügin Saud Arabiyasınıñ memlekettik SPA aqparattıq agenttigi arqılı jariyalanğan habarlamada" zımıran qaldıqtarına jürgizilgen zertteuler onıñ Iranda dayındalğanın rastağanı" aytılğan. Sonday-aq, onda: "Iran Hauti basqınşılarına Saud Arabiyasınıñ halqı men wlttıq müddelerine qarsı qoldanu maqsatında qaru jetkizgen", - delingen. Saud Arabiyası bwl jağdaydı bükil öñirge jäne älemge qauip töndiretin akt dep sanap, Iran özine astırtın soğıs jariyalap otırğanın mälimdedi.

Saud Arabiyası Yemendegi Hauti belsendileri turalı aqparat üşin ondağan million sıyaqı tağayındap, toptıñ 40-qa juıq müşelerin qolğa tüsirdi. Ballistikalıq zımıran wşırılğannan keyin birneşe sağat ötken soñ, Saud Arabiyası küşteri Sana öñirin bombıladı.

Yemende 2015 jılı bastalğan azamattıq soğıstı sarapşılar Saud Arabiyası men Iran arasındağı "proksi-soğıs" dep ataydı. Öytkeni olardıñ ärqaysısı öñirdegi biligin küşeytu üşin Yemendegi bir-birine qarama-qayşı toptardı qoldap otır. Jergilikti qaqtığıstar nätijesinen mwnda 10 mıñğa juıq adam qaza tapqan.

“The Qazaq Times”