Özbekstannıñ qazirgi basşısı Şavkat Mirzieev. Foto: RIA Novosti.

Körşimiz, özbek elinde bwrın soñdı bolmağan jañalıqtar bolıp jatır deuge boladı. Bwrın sırtpen qarım-qatınasta salqındıq tanıtıp, avtoritarlıq sayasat wstanğan elde bügin jağday mülde özgerip keledi. Şetel sarapşıları Özbekstanda eldi tübegeyli özgertetin progressivti reformalar jasalıp jatır dep qaraydı. Bwl turalı BBC onlayn qızmeti saraptap jazdı.

Şavkat Mirzieev bir jıl bwrın Özbekstan tağına otırğan kezde, keybir sarapşılar, onı Özbekstandağı qatañ rejimdi jalğastıradı, tipti kerek bolıp jatsa odan da qatañ qalıpta wstaydı dep boljağan edi. Biraq, bir jılğa jetpeytin uaqıtta prezident Şavkat Mirzieev «sayasi qılmıstı bop qamalğandardı bosatıp, elge BWW-nıñ Adam qwqıqtarı jönindegi Joğarı komissiyasın kirgizedi» dep eşkim aytpadı da, boljamadı da.

Qazir Özbekstan ükimetinde memlekettik organdardı sınğa alatındar payda bola bastadı. Bwl bwrınğı prezident Islam Karimovtıñ kezinde eşkimniñ oyına da kirmeytin ister edi. Qazir Şavkat Mirzieev ükimet pen memlekettik mekemelerge tağılğan ayıptı özi tikeley qadağalap otır. Tipti ol: «Bizge sın kerek. Sın nätijeni alıp keledi», - dep, jastarmen kezdesuler wyımdastırğalı otır.

Tek bwl ğana emes, Özbekstan prezidenti ükimettik organdar men qızmetkerlerdi özi de auır sındarğa ala bastadı. Mısalı ol prokurorlardı «eñ ülken wrılar» dep sınadı. Ol bir sözinde: « Prokurorlar eldiñ eñ ülken sorına aynaldı. Eger taza istemese, onıñ bäri jwmıstan ketetin boladı», – dedi.

Bwrın el azamattarı äleumettik orındardıñ qanday da bir qiınşılığın, eldi mekenderdegi auız su, gaz sekildi şeşilmegen problemaların, biliktegilerdiñ sıbaylas jemqorlıq qılmıstarın qwqıq qorğauşılarğa aytudan jasqanıp kelgen. Qazir äleumettik mäselelerdi aşıq ortağa salıp, ükimettiñ şeşuin talap etetin qoğamğa ayaq basıp keledi. Tipti joğarı biliktegilerdiñ jemqorlığı turalı da aşıq aytılatın boldı. Bwrınğı cenzurada wstalğan azamattar aşıq pikir bildiruge batıldıq etetin boldı.

Osı aydıñ basında ükimeti valyutanı erkin bağamğa jiberdi. Şetel valyutasın aynalımğa kirgizuge rwqsat berdi. Özbekstanda köp jıldardan beri alğaş ret şetel valyutasın bankterde legaldı türde almastıratın boldı.

Degenmen Özbekstanda bolıp jatqan refrmanıñ aldağı uaqıtta nege wlasatını turalı aytu qiın. Bwl reforma qanşalıq jalğasadı, Şavkat Mirzieev öziniñ liberaldı reformaların qanday maqsatta jasap otırğanı turalı türli boljamdar aytıluda. Bireuler bwnı strategiyalıq damuğa şart-jağday jasap, memlekettik jüyeni bekemdeu dep qaraydı. Al keybir sarapşılar bwl reformalardı qazirgi prezidenttiñ bilikti bir ortalıqqa jwmıldıru üşin jasap otırğan qadam dep sanaydı. Meyli qalay desek te Özbekstan biligi Islam Karimov kezindegige qarağanda sırtqa aşıq qarım-qatınas ornatıp, el işinde erkindikke jol berip otır.

“The Qazaq Times”