Putin jäne Tramp. Foto: RFI.

AQŞ-tıñ Reseyge qarata salğan sankciyasınıñ kölemi artıp kele jatır. Seysenbi küni AQŞ ükimeti Qıtay men Reseydiñ 16 wyımı men jeke twlğalarına, Soltüstik Koreyanıñ zañsız sauda aynalımına qatısı bar degen ayıppen sankciya saldı. Osığan oray Resey sırtqı ister ministriniñ birinşi orınbasarı mälimdeme jasap, Mäskeu jaqtıñ Uaşington tarapına layıqtı jauabın äzirlep jatqanın ayttı. Bwl turalı IRNA-ğa silteme jasay otırıp, «Parstoday» aqparattıq agenttigi habarladı.

Resey SİM basşısınıñ orınbasarı sözinde: «Barak Obama twsınan bastalğan Resey men AQŞ ara-qatınasınıñ naşarlauı büginde jalğasın taptı. Mäskeu ärqaşan qayşılıqtardı kelissöz arqılı şeşudi qalaydı. Al, AQŞ bolsa osı kezge deyin sankciyalardıñ kelissözge kedergi bolıp, eki el arasındağı qarım-qatınastı şielenistire tüsetinin tüsinbey keldi», – dep ayıptadı. Sonday-aq ol sözinde aldağı uaqıtta Mäskeu jaqtıñ AQŞ sankciyasına qarsı pärmendi jauap äzirlep jatqanın basa aytıp ötti.

Äzirge Mäskeudiñ AQŞ sankciyasına qanday jauap äzirlep otırğanı belgisiz. Biraq, kezekti sankciyanıñ bolmasa da, bwdan bwrınğı jäne aldağı boluı mümkin şekteu şaraları Orta Aziya elderine, Qazaqstanğa äser etpeydi dep ayta almaymız. Dürdaraz AQŞ pen Resey arası tatulıqtan barğan sayın alıstap baradı. Dese de bir närse anıq – sankciya eki eldi tatulıqqa şaqırmaydı. Esesine, AQŞ pen sankciya wşına ilikken elder arasında arazdıqtı küşeytedi.

“The Qazaq Times”