"Sad" zımıranğa qarsı jüyesiniñ zımıran qondırğılı kölikteri. Foto: The Sun.

29 şildeniñ taña atpay jatıp, Oñtüstik Koreya prezidenti Mün Ja-In Wlttıq qauipsizdik keñsesinde şwğıl otırıs ötkizdi. Jinalısta ol Oñtüstik Koreya-AQŞ arasındağı strategiyalıq tejeu bağdarlamalardı nığaytudı jedeldetu turalı tapsırma berdi. Bwl «Sad» zımıranğa qarsı jüyesiniñ, zımıran qondırğılı 4 köligin ornalastırudı da öz işine qamtidı. Bwl turalı «Şinlañ» aqparattıq agenttigi habarladı.

«Sad» zımıranğa qarsı jüyesi 6 zımıran qondırğılı kölikten qwraladı. Sonday-aq, radiolokaciyalıq jüyelerdi de qamtidı. Biıl naurızdıñ bas şeninde zımıran qondırğılı kölikterdiñ ekeui Oñtüstik Koreyağa jetkizilgen.

«Sad» jüyesin ornatu Qıtaydıñ qarsılığına wşırap kele jatqan, Qıtay-Koreya arasındağı bastı qayşılıqtıñ biri. Degenmen, Soltüstik Koreyanıñ zımıran sınaqtarı jiilegen sayın, AQŞ pen Oñtüstik Koreya «Sad» jüyesin ornatudı qajet dep tabadı. Bwl qayşılıq Korey tübegindegi jäne Soltüstik Şığıs Aziyadağı bitpes daudıñ bir wşı.

Qıtay SİM-niñ birinşi mausımda jariyalağan habarında, AQŞ-tıñ «Sad» jüyesin ornalastıruı, Qıtaydıñ strategiyalıq qauipsizdigine auır ziyan keltirip, aymaqtağı strategiyalıq tepe-teñdikke nwqsan jetkizedi; aymaqtağı twraqtılıq pen qauipsizdikke qater töndiredi degen bolatın. Sonımen birge, bwl jüye ornalastırılsa, aymaqtağı qayşılıqtı kelissözder arqılı şeşu qiınğa soğadı dep qaraydı. Mine osınday uäjderin aytıp, resmi Beyjiñ «Sad» jüyesin mañına jolatqısı kelmegen.

Oñtüstik Koreya prezidentiniñ şwğıl türde ötkizgen qauipsizdik keñesinde, «Sad» qaytalay auızğa alınıp, AQŞ-Koreya arasındağı strategiyalıq qorğanu bağdarlamaların nığaytu kerektigin alğa tartsa, Qıtay-Koreya arası tağı da alıstay tüspek.

“The Qazaq Times”