Reseydiñ Qazaqstandağı bas konsulı Evgeniy Bobrov diplomatiyalıq qızmetin ayaqtağan, ol 26 tamızdan bastap jwmıs istemeydi. Bwl turalı Azattıq radiosı Qazaqstan sırtqı ister ministrliginiñ resmi ökili Aybek Smadiyarovtıñ mälimdemesine silteme jasadı.
Bobrov ötken aptada TASS aqparat agenttigine bergen swhbatında Qazaqstandağı orıstildi sınıptardıñ azayğanın aytıp, Qazaqstan oqu-ağartu ministrligin ayıptay söylegen.
"Bwğan bir ob'ektivti sebep bar, ol – orıs halqınıñ 15,2 payızğa qısqaruı. Bwğan qosa, tağı bir naqtı sebep bilim salasındağı ministrliktiñ qazaq tiline basımdıq beretin memlekettik bağdarlaması" degen edi Bobrov. Onıñ bwl sözi Qazaqstan qoğamında qarsılıq tudırdı.
Smadiyarov jurnalisterdiñ "Bobrov qızmetin ayaqtap ketip bara jatıp, osı sözdi aytıp ketti me?" degen swrağına jauap bermedi, Bobrovtıñ sözi "dwrıs emes" dedi.
Keyingi uaqıtta Reseyde Qazaqstandağı wltaralıq qatınastar jäne orıs halqınıñ jağdayı turalı ärtürli deñgeydegi talqılaular küşeygen. Reseylik sayasatkerler men propaganda jurnalisteri ara-twra "Qazaqstanda orıs tiline qısım jasalıp jatır" dep birneşe ret mälimdeme jasağan. Reseylik sayasatkerler Qazaqstandağı qazaq tildi belsendilerdiñ äreketin jäne tilge qatıstı zañdardı jii sınğa da alğan.
Qazaqstan prezidenti Qasım-Jomart Toqaev bıltır 7 qazanda Sankt-Peterburgte TMD elderi basşılarınıñ beyresmi sammitinde TMD janınan orıs tilin qoldau jäne damıtu boyınşa halıqaralıq wyım qwrudı wsınğan. Wsınıstı Resey basşısı Vladimir Putin qoldağan edi.
