Qazaqstannıñ türli aymağında 1 mamırda miting ötkizu turalı ötiniş berilip jatqan kezde Aqtauda azamattıq belsendi Wlbosın Twrdieva 20 täulikke qamaldı. #BelsendilerEkstremistEmes telegram-arnasınıñ habarlauınşa, sot şeşimine kelispegen belsendi aştıq jariyalağan. Bwl turalı Ortalıq Aziya jañalıqtar qızmeti jazdı.

Azattıq tilşisi äzirge belsendi otırğan uaqıtşa qamau izolyatorınan jauap ala almadı.

Sot onı "jala jabu" babı boyınşa kinäli dep tapqan. Sud.kz saytındağı mälimetke qarağanda, isti sud'ya Aida Ataşeva qarağan. Äzirge portalğa sot şeşimi jariyalanğan joq.

#BelsendilerEkstremistEmes telegram-arnasınıñ habarlauınşa, şamamen eki ay bwrın belsendi tikeley efirge şığıp, "Z" belgisi bar (Reseydiñ Ukrainadağı soğısınıñ belgisi) düken iesiniñ üstinen şağım tüsirgen. Öz kezeginde düken iesi de Twrdievanıñ üstinen şağım tüsirip, onı jala japtı dep ayıptağan. İzinşe äkimşilik is qozğalıp, sol is boyınşa belsendi äkimşilik qamauğa alındı. Telegram-arnanıñ jazuınşa, policiya Twrdievanıñ şağımın qarausız qaldırğan.

Al düken iesi Nwray Dosmwhamedova Azattıqqa Aizere attı dükeniniñ logotipi 16 jıldan beri twrğanın, düken atauınıñ "soğısqa eş qatısı joğın" aytıp, belsendi "meni qaraladı" dedi.

Qazaqstan aymaqtarında belsendiler 1 mamırda miting ötkizuge ötiniş berip jatqanda, Pavlodarda sot belsendi Embergen Qwrmanovtı beybit miting erejesin bwzdı degen ayıppen 15 künge qamağan. Bwğan deyin birqatar aymaqta belsendiler jergilikti äkimdik beybit miting ötkizuge rwqsat bermey jatqanın habarlağan. Äkimdiktiñ resmi jauaptarında 1 mamırda "basqa şara ötetini" jazılğan.

Qazaqstanda 2020 jılı "Beybit jiın turalı" jaña zañ qabıldanğanımen, qwqıq qorğauşılar azamattardıñ beybit jiın ötkizu jäne jinalu qwqığı äli şektelip otırğanın sınaydı. Halıqaralıq jäne qwqıq qorğauşılar resmi Astananı azamattardıñ beybit jinalu qwqığın saqtauğa ündep keledi.

Qazaqstan biligi elde azamattardı sayasi belsendiligi üşin qudalaytının moyındamaydı.