27 aqpanda Qazaqstan Joğarğı sotı qoğam belsendisi Äygerim Tileujannnıñ "mäjilis deputattığına kandidat retinde saylauğa qatısuına kedergi joq" degen şeşim şığardı, -dep jazdı Ortalıq Aziya jañalıqtar qızmeti.

"Almatıdağı №3 birmandattı aumaqtıq saylau okruginiñ saylau komissiyasınıñ hattaması zañsız dep tanıldı. Olqılıqtı tüzeu turalı şeşim şığarıldı. Bwl – tüpkilikti şeşim" dedi sud'ya Berik Näjimedenov.

Almatıdağı №3 birmandattı aumaqtıq saylau okrugi Äygerim Tileujandı 19 naurızda ötetin mäjilis saylauına ümitker retinde tirkeuden bas tartqan. 18 aqpanda komissiya müşeleri Äygerim Tileujannıñ saylau jarnasın tölegeni turalı bank mälimetine kümän keltirgen.

"Äygerim Tileujan 17 aqpanda jarna tölegeni turalı tübirtek wsındı. Ümitkerdi tirkeuge negiz bolatın qwjattı üyqamaqta otırıp wsınğandıqtan, qwjattıñ dwrıstığı kümän tuğızadı" dep jazılğan saylau komissiyasınıñ hattamasında.

Äygerim Tileujan saylau jarnasın senimdi ökili arqılı tölegenin, bwl jayt zañğa qayşı emes ekenin alğa tartıp, Joğarğı sotqa şağımdanğan.

Sot otırısı kezinde sud'ya şağımdanuşı Äygerim Tileujannıñ saylau jarnasın tölegeni turalı qwjattı bank rastağanın ayttı. Bank anıqtamasında 17 aqpanda ortalıq saylau komissiyasınıñ arnaulı şotına Äygerim Tileujannıñ atınan 1 million 50 mıñ teñge aqşa tüskeni jazılğan.

Bwdan keyin aumaqtıq saylau okrugi ökili "özderine prokuraturadan hat kelgenin, onda üyqamaqta otırğan Äygerim Tileujannıñ saylauğa qatısqanı oğan qoyılğan şekteuge, yağni üyqamaq şarasına qayşı keletinin jäne qılmıstıq istiñ ob'ektiv tergeluine kedergi boluı mümkin ekeni" jazılğanın ayttı.

"Saylau turalı" zañda üyqamaqtağı adamdı ümitker retinde tirkemeu jöninde jazılğan ba?" dep swradı sud'ya. Alayda aumaqtıq saylau okruginiñ ökili "prokuraturanıñ sözin orındauğa mindettimiz" dep qana jauap berdi. Sud'ya zañ boyınşa azamat üyqamaqta bolğanı onıñ ümitker retinde tirkeluine kedergi emes ekenin tüsindirdi.

Advokat Aynara Aydarhan Äygerim Tileujan saylau komissiyasına qayta tirkelip, saylau kampaniyasına kirisetinin ayttı.

Almatı sotı Qañtar oqiğasına baylanıstı ayıptalğan belsendi Äygerim Tileujandı eki ayğa üyqamaqqa alu turalı 2022 jılğı 17 qaraşada şeşim şığarğan. Oğan baylanıs qwraldarın paydalanuğa, äleumettik jelige jazba jazuğa tıyım salğan.

Biıl qañtarda Qazaqstan parlamentinde ötken tıñdau kezinde bas prokuror Berik Asılov Äygerim Tileujandı "Qañtar oqiğası kezinde Almatı äuejayın basıp aludı wyımdastıruşı" retinde atağan.

Bıltır qazan ayınıñ soñında Äygerim Tileujan özin Qañtar oqiğasımen baylanıstı iste "kuägerden" "küdiktige" auıstırğanın habarlağan edi. Aytuınşa, ol 5 qañtarda Almatı äuejayında jappay tärtipsizdikti wyımdastırdı degen küdikke ilingen.

Äygerim Tileujan Qañtar oqiğası kezinde äuejayğa barğanın moyındağan, biraq "äuejaydı basıp alu äreketin wyımdastırdı" degen ayıptı joqqa şığarğan.