Qazaqstanda qalıñ qarğa baylanıstı 127 avtojol aumaqtarı jabıldı, 49-ı – respublikalıq, 78-i oblıstıq mañızı bar joldar. Bwl jöninde 4 qañtarda tötenşe jağday ministrliginiñ baspasöz qızmeti habarladı.
Vedomstvonıñ habarlauınşa, jolda qalğan jolauşılardı qwtqaru maqsatında respublikalıq jäne aymaqtıq ştabtar qwrılğan.
"Blokbeketterde 600 kölik twrıp qaldı. Ötken täulikte qwtqaruşılar 691 adamdı qwtqarıp, qauipsiz jerge köşirdi, 137-si – bala (Jambıl, Türkistan, Qostanay, Qarağandı, Abay oblıstarında). 145 tehnika süyrep şığarıldı" dep jazılğan vedomstvo habarlamasında.
Aymaqtarda uaqıtşa jılınu orındarı aşılğan. Jambıl, Abay, Aqmola, Qostanay jäne Pavlodar oblıstarında mwnday orındarında 420 adam bar, 69-ı – bala.
"Qazgidromet" mälimetinşe, 4 qañtarda Qazaqstannıñ basım böliginde qar jauıp, köktayğaq boladı.
