Resey prezidenti men Vengriya prem'eri Mäskeude kezdesti. Foto,: Reyter. Russian President Vladimir Putin speaks during a news conference following talks with Hungarian Prime Minister Viktor Orban in Moscow, Russia February 1, 2022. Yuri Kochetkov/Pool via REUTERS

Qalıptasqan auqımdı geosayasi dağdarısqa qatıstı köpten beri pikir bildirmegen Resey prezidenti Vladimir Putin AQŞ Reseydi soğısqa itermelep jatır degen mağınada mälimdeme jasadı. Onıñ aytuınşa, Uaşington Reseyge köbirek sankciya salu üşin taraptardıñ qayşılığın paydalanıp otır.  

Prezident Putin Vengriya prem'er-ministri Viktor Orbanmen Mäskeudegi kezdesui kezinde: «AQŞ Urkinanıñ qauipsizdigi üşin onşalıqtı alañdap jatpağanı körinedi... AQŞ-tıñ bastı maqsatı Reseydiñ damuın toqtatu, bwl üşin Ukrainanı qwral qatarında qoldanğısı keledi», – degen pikirin ortağa salğan.

Osımen qatar Ukrainağa saparlay barğan Britaniyanıñ bas uäziri (prem'er-ministri) Boris Jonson: «Resey Urainanıñ basına mıltıq kezep twr», – dep saldı. Ol sonday-aq, Resey qol salatın bolsa Ukraina armiyası qarsı twruğa dayın ekenin de aytıp ötken. «Resey qayşılıqtı retke keltirip, dialogqa keledi dep ümittenemin», – dep qosımşalaydı Jonson.

Bwl saparında ağılşın prem'eri Jonson Britaniyanıñ Ukraina qarulı küşterin qoldau maqsatında 119 mln AQŞ dolları kömek beretinin de mälimdedi.

Ukraina prezidenti Zelenskiy bolsa Resey Ukrainağa soğıs aşatın bolsa bwl soğıs tek Resey-Ukraina arasındağı ğana emes, Resey men Europa arasındağı soğıs bolatının eskertti. Bwğan qosa ol Batıstı Resey soğıs aşsın-aşpasın qatañ sankciyalar saluğa şaqırdı.

Kreml' basşısınıñ sözine sensek, Qwrama Ştattar Reseydiñ Europadağı NATO äreketterine qatıstı alañdauşılığına köñil audarıp otırğan joq. Bwğan deyingi kelissözderde Mäskeu tarabınıñ postkeñestik elderdiñ NATO-ğa qosılmauı, wyımnıñ şığısqa jıljımauı sekildi talaptarı keri qaytarılğan edi.

Resey basşıları Ukrainağa qarsı soğıs aşu josparımız joq degenimen, şekara mañındağı 100 mıñnan astam äskeri men auır äskeri tehnikaların keri qaytarmay otır. Keler aptada Germaniyada taraptar şeşuşi kelissöz otırısın ötkizedi. Soğıstıñ bolatın-bolmaytını osı kelissöz otırısına qatıstı degen pikirlerde şığıp jatır. Qazir taraptardıñ wstanımındağı qayşılıq dağdarıs pen soğıstıñ biltesi bolıp twr deuge boladı.

The Qazaq Times