Foto: euronews.com

Kanada Parlamentiniñ tömengi palatası – Qauımdar palatası Qıtay biliginiñ Şıñjañdağı äreketin genocid dep tanıdı. Parlament saytında jariyalanğan tiisti proceduranı oppoziciyalıq Konservativti partiyanıñ deputattarı qoldadı.

Qwjattı qabıldauğa 266 deputat dauıs bergen. Qarsı dauıs bolğan joq. Dauıs beruge qatısqan Kanadanıñ Sırtqı ister ministri Mark Garno, bileuşi liberaldı partiyanıñ deputatı «Ministrler Kabinetiniñ barlıq deputattarı Şıñjañdağı ahualdı adam qwqıqtarın taptau jäne genocid dep sanaytının» ayttı.

Endi Parlament müşeleri olardan keyin Kanada ükimeti wyğırlarğa qatıstı jağdaydı genocid dep moyındaydı dep ümittenedi. Sonımen qatar, resmi Ottava 2022 jılğı Olimpiadanı Beyjiñde ötkizbeu kerektigin ayttı.

Bwğan deyin Kanada biligi Qıtaydıñ Şıñjañda adam qwqıqtarı bwzılğanın birneşe ret aytqan bolatın. 19 aqpanda Kanadanıñ prem'er-ministri Djastin Tryudo «Ülken jetilik» elderiniñ virtualdı sammitinde Qıtaydağı mwsılmandardıñ jağdayına toqtalıp ötken.

2018 jıldıñ tamızında BWW Adam qwqıqtarı jönindegi Joğarğı Komissar basqarmasınıñ ökilderi Şıñjañdağı tüzetu lagerlerinde 1 mln-ğa deyin mwsılmandardıñ zañsız qamalğanın mälimdedi. Basqarma bwl jağdayğa alañdauşılıq bildirip, osı aymaqqa baqılauşılar jiberudi wsındı.

Qıtay biligi Şıñjañda penitenciarlıq mekemelerdiñ ornalasqanı turalı aqparattı birneşe ret joqqa şığardı. Sonımen qatar, 2018 jıldıñ soñında olar öñirde bilim beru jäne käsiptik dayarlau ortalıqtarı jwmıs isteytinin ayttı. Qıtay basılımdarınıñ mälimdeuinşe, onda terrorizm men ekstremizm ideyalarınıñ ıqpalına tüsken, qıtay tilin, jazu negizderin, kommunikativtik dağdılardı jäne QHR zañnamasınıñ negizderin oqitın adamdar bar. Bwl ortalıqtardağı adamdardıñ naqtı sanın Qıtay biligi jasırın wstap otır.

Qañtarda AQŞ-tıñ bwrınğı Memlekettik hatşısı Mayk Pompeo Amerika Şıñjañdağı jağdaydı «genocid jäne adamzatqa qarsı qılmıstar» dep tanıdı.

"The Qazaq Times"