Almatı, Arbattağı bwzılğan ashana. 28.03.2017. Foto: «The Qazaq Times».

Küni keşe ğana Arbattıñ qaq ortasında ornalasqan ashananı jermen jeksen etken sot orındauşılarınıñ bwl äreketi zañğa säykes belgilengen merzimde orındalğandığı aytılıp jatır. Atalğan mekenjay boyınşa jalğa berilgen jer teliminiñ uaqıtı 2016 jıldıñ 27 naurızında ötip ketken.  Basqarma men qwrılıs saluşılarğa qatıstı QR äkimşilik qwqıq bwzuşılıq boyınşa kodeksiniñ 319 babımen mamandandırılğan audanaralıq sotına äkimşilik is jiberilgen bolatın. Borışkerge aldın ala eskertu hatı jiberilgen, biraq öz erkimen bwzu turalı eşqanday şara qoldanılmağandıqtan, äkimşilik tarapınan küştep qiratu jwmıstarı jürgizilgen.

Al "Qonaev" atındağı qordıñ üstinen  äkimşilik is qozğalıp jäne ükimettiñ jerin zañsız basıp aldı degen ayıppen qomaqtı kölemde ayıppwl da salınıp otır. Sebebi, bwzılğan Ashanağa solardıñ qatısı bar dep otır.

Osı mäselege baylanıstı birneşe swraqtıñ tuındaytını ras. Eger bwl aymaqqa belgili bir normativtik rwqsat berilmey, sonımen qatar qwrılıs jwmıstarı avtorlıq jäne tehnikalıq baqılausız jürgizilgen bolsa, birneşe jıldan beri jeke käsipkerdiñ şağın käsibin döñgeletip kelgeni jäne qwqıq qorğau organdandarınıñ nazarına endi ğana ilikkeni.

Eger jer tilimin zañsız iemdenip qwrılıs jwmıstarı jürgizilgen bolsa, osı ashana jeke käsip retinde qalay tirkelgen boluı mümkin?

Almatı qalasınıñ jerdiñ paydalanıluı men qorğaluın baqılau basqarmasına osı ob'ektiniñ zañsız salınğandığı jäne jalğa beru uaqıtınıñ ötkendigi jayında jeke twlğadan aqparat kelip tüsken. Osı arızdıñ negizinde tekseris jwmıstarı jürgizilip, zañbwzuşılıq faktorları anıqtalğan eken. Soğan säykes komitet sotqa şağım tüsirip, sot şeşimi negizinde Almatı qalasınıñ Memlekettik säulet- qwrılıs baqılau basqarması "Kompot" ashanasın qiratu jwmıstarına kirisken. Zañğa säykes birneşe märte eskertu qağazdarı jiberilip, ashana qojayını jerdi öz erkimen bosatuı talap etilgen bolatın.

Almatı, Arbattağı bwzılğan ashana. 28.03.2017. Foto: «The Qazaq Times».

Komitet ökilderiniñ aytuınşa, jalğa alu uaqıtı ötip jäne zañsız twrğızılğandıqtan, jeke käsipkerge eşqanday ötemaqı tölenbeydi. Kerisinşe, äkimşilik is qozğalıp, ayıppwl salınğan. 

Almatı qalasınıñ jerdiñ paydalanıluı men qorğaluın baqılau basqarmasına jeke twlğadan aqparat kelip tüspese, ashana äli de öz jwmısın jalğastıra berer me edi? 

Jalpı qaladağı memleketke tiesili jäne jalğa berilgen aymaqtarğa qwrılıs jwmıstarın jürgizu jäne jeke käsip aşu sekildi mäselerdi qarastıratın bolsaq, qwrılıs nısandarınıñ zañdı nemese zañsız ekendigi jayında arnayı tirkeletin aqparat joq bolıp otır. Komitet ökilderi: "Biz qalanıñ barlıq qwrılıs nısandarına barıp, zañdı, ne zañsız ekendikterin tekseruge mindetti emespiz. Al kez-kelgen twlğadan belgili bir aqparat kelip tüsse ğana sol nısan jayında zertteu jwmıstarın jürgizuimiz qajet" - deydi-mıs.

Sonda qalada tağı da jalğa beru uaqıtı ötken nemese zañsız twrğızılğan qwrılıs nısandarı boluı mümkin jäne kez-kelgen uaqıtta olardı da däl osılay qiratuı da ğajap emes degen söz. Al kelip tüsken aqparat, arızdar arnayı portalğa tirkeledi. Biraq bwl aqparat tek qwzırlı organdardıñ ökilderine ğana qoljetimdi. Ayta ketetin bir jayt, arız beruşiniñ sebebi eskerilmeydi, tek aqparat qana qarastırılmaq.

«The Qazaq Times»