Foto: South China Morning Post

Älemniñ talqılauındağı bastı taqırıp retinde twrğan – Korey tübegi mäselesi ötken apta men osı aptada bir qatar tıñ özgeristerge wşıradı. AQŞ memlekettik hatşısınıñ Şığıs Aziyadağı üş elge birdey jasalğan saparı, Korey tübegi mäselesine ülken ıqpaldar etti. Alayda, ötken aptanıñ soñında Soltüstik Koreya quattı jaña zımıran qozğaltqıştarı sınağında tabısqa jetkendigin jariyaladı. Al bwğan qarsı Tramp ükimeti naqtı poziciya bildirmey otırğanın tanımal “ The Wall Street Journal” habarlağan bolatın. Basılımnıñ aytısına qarağanda Tramp ükimeti Soltüstik Koreyanıñ bwl habarı, ädeyi dürliktiru äreketi boluı mümkin, aqparattıñ ras-jalğanın tekseremiz degen.

Eger olar aytqanday quattı jaña zımıran qozğaltqışınıñ sınağı şınımen de sätti bolğan bolsa, Soltüstik Koreya Amerika Qwrama Ştattarına wşıp jetetin, yadrolıq qaru tasımaldağış zımıranğa qol jetkizdi degen söz. Bwl AQŞ üşin asa üreyli habar. Sebebi, jwrtqa mälim bolğanınday Soltüstik Koreyanıñ eñ bastı arandatu nısanı AQŞ, Oñtüstik Koreya jäne Japoniya. Tramp ükimetiniñ KHDR-ğa neğwrlım agressivti közqarastı wstanatını belgili boldı. Al, AQŞ memlekettik hatşısı Şığıs Aziyağa jasağan saparı barısında Soltüstik Koreyamen diplomatiyalıq kelisim jasasu konsul'taciyaların qabıldamadı. Bwl wsınıs oğan Beyjiñde QHR basşısımen kezdesude qoyılğan bolatın. Esesine Tillerson äskeri äreketterdiñ mümkindikterin köterudi quattadı.

Soltüstik Koreyadağı «Ortalıq aqparat» agenttiginiñ habarında, ötken aptanıñ Senbi küninde QHDR tarabı quattı zımıran sınağın jasadı delinse de, Aq üy, Pentagon jäne AQŞ Memlekettik departamenti eşqanday lebiz bildirmey otır. Al «Ortalıq aqparat» agenttigi Kim Çen Innıñ: «Bügin älem bizdegi ülken jañalıqqa eriksiz kuäger boladı, bizdiñ älemdi özgerte alatınımızğa senetin boladı», – degen sözin de qosa taratqan bolatın.

AQŞ memlekettik hatşısı Tillerson men QHR törağası Şi Jinpin (Si Czin'pin) ötken jeksenbi küni jartı sağattan asa keñeste boldı. Soltüstik Koreya mäselesi AQŞ-QHR qatınasındağı mañızdı tüyin bolğanımen, kezdesu barısında AQŞ jaq Soltüstik Korey mäselesin auızğa almadı. Osınıñ özi eki el arasındağı diplomatiyanıñ qıldan näzik bolıp bara jatqanın körsetse kerek. Degenmen, Tillerson men Şi Jinpinniñ kezdesui – säuir ayındağı Tramp pen Şi Jinpinniñ resmi kezdesuiniñ dayındığı. Sol üşin de asa mañızdı tüyinderdi eki eldiñ eñ joğarı basşıları kezdesu barısında tilge tiek etpek. Sonımen, Tillerson Seulde twrıp: «Beyjiñ saparında Qıtaydı Soltüstik Koreyağa birlese qarsı twruğa şaqıramın», – degen sözinde twrmadı deuge boladı. Djordj Buş biligi twsında Soltüstik Koreyağa qaratqan sayasattı qadağalauşı Viktor Ça: «Tramptıñ komandası Soltüstik Koreya ötken senbi küni ne istedi dep qarap jürgende, QHDR-nıñ ıqpal küşi keñeyip bara jatır. Biz oğan jol bermeuimiz kerek», – degen közqarasın bildirdi. Ol jäne: «AQŞ ükimeti sırtqı älemge Soltüstik Koreyanıñ är bir äreketi AQŞ-a dürbeleñ tuğızatının oylatpauğa tırısadı. Al bwl nağız Soltüstik Koreya kütken nätije». Alayda ol da Soltüstik Koreya jaña zımıran qozğaltqışına qol jetkizgenin rastaudıñ mañızdılığın Viktor Ça da moyında otır.

AQŞ ükimetiniñ resmi ökilderi men basqa da sarapşılardıñ aytısına qarağanda, Tramp ükimetiniñ tap bolıp otırğan eñ mañızdı qauipsizdik mäselesi bolsa – Soltüstik Koreyadan keletin qater. AQŞ-tıñ jaña äkimşilik kün tärtibinde Soltüstik Korey mäselesi AQŞ-Qıtay arasına ülken alauızdıq äkelui mümkin dep qaralıp, soğan say jaña Aziya-Tınıq mwhit sayasatın wstanğalı otır. Al Tillersonnıñ saparınıñ bastı maqsatı Korey tübegi mäselesin şeşuden köri, Japoniyağa barınşa ıqpal etu üşin ekeni belgili boldı. Al Beyjiñ jäne Seul tarabımen Soltüstik Koreya ballistikalıq zımırandarı men yadrolıq qaruların damıtu isin auızdıqtau kelisim şartına qol jetkizu Qıtayğa kelgende sätsiz boldı. Alayda, AQŞ öz qadamınıñ nätijesiz bolmaytının aytıp otır.

Qıtay ükimetiniñ resmi ökili de, Soltüstik Koreya mäselesine jauap beruden bas tarttı.  Qıtay men AQŞ qarım qatınası jäne tübek jağdayın oñau isi tağı bir satı keyinge qaldırıldı. Al Soltüstik Koreya şınında quattı zımırandarğa qol jetkizgen bolsa, onda AQŞ bwl jolğı kelissöz orayın qoldan berip alğan bolıp sanaladı.

 “The Qazaq Times”