Foto: evrensel.net

"Ündistannıñ şığısındağı Assam ştatında twratın bes millionğa juıq mwsılman, tisti organdarğa özderiniñ nemese özderine deyingi otbası müşeleriniñ 1971 jıldan bwrın da sol jerde ömir sürgenin däleldeytin qwjat tauıp bere almaularına baylanıstı jer audarıladı", - dep habarlaydı "evrensel.net" aqparat agenttigi.

Assam ükimetiniñ Wlttıq azamattardı tirkeu byurosı öz azamattarına qatıstı resmi tirkeu tizimin jasaudı qolğa alğan. Osı resmi qwjattau isiniñ belsendileri altı jıl işinde jüzege asırılğan tizim jariyalau isiniñ Bangladeşten qwjattandırılmağan köşpendilerdi anıqtap, deportaciyalauğa bağıttalğanın habarladı. Assam, şamamen 32 mln.nan astam (olardıñ üşten biri mwsılman) adamdı panalatıp otır. Endi Assamnıñ wlttıq azamattardı tirkeu isine jauaptı Pratiik Hajela, 4.8 mln adamğa qatıstı aldın ala tizim jariyalanbas bwrın, olardıñ özderinen talap etilgen "bwrınğı qwjattardı" wsına almağandarın ayttı. Al Ündistan prem'er-ministri Narendra Modidiñ "Bharatiya djanata" partiyası qoldarında onday qwjattarı joq mwsılmandardı jer audaratının mälimdedi.

Tarihqa üñilsek, 1970 jıldardıñ basında on mıñdağan mwsılman Päkistandağı täuelsizdik soğısı kezinde Bangladeşten Assamğa bas sauğalağan. 1980 jıldarı "kelimsekterge" qarsı wyımdastırılğan ereuilderde jüzdegen adam qaza tapqan. Endi sol kezde barğan mwsılmandar Ündistan azamatı retinde özderin däleldeu üşin özderiniñ nemese özderinen bwrınğı otbası müşeleriniñ Assamda sol uaqıttan bwrın twrğandarın däleldeytin qwjat wsınuları tiis. Olardıñ osı jıldıñ 30 säuirine deyin ğana uaqıttarı bar.

Alayda, sınşılar mwsılmandar men bangladeştik bosqındar älemniñ eñ qanalğan azşılığı sanalatın rohin'ya mwsılmandarınıñ kebin kiyuleri mümkin dep boljaydı.

“The Qazaq Times”