foto: aljazeera.com

Bahreyn sotı sayasi belsendi Nabel Radjaptı (Nabeel Rajab) ğalamtordağı komment üşin 5 jılğa türmege jiberdi, - dep habarlaydı Al Jazeera aqparat agenttigi.

Ol ğalamtorğa qaldırğan kommentinde Yemendegi soğısqa baylanıstı Saud Arabiyasın sınğa alıp, eldegi türmelerdi baqılau jüyesine köñili tolmaytındığın bildirgen.

Adam qwqıqtarı jönindegi Bahreyn ortalığı Radjaptıñ qılmıs kodeksinde körsetilgendey, "soğıs kezinde jalğan qaueset taratqanı", "basqa eldi sıylamağanı" jäne "jarğılıq organdı qwrmettemegeni" üşin ayıptalğanın mälimdedi.

Adam qwqıqtarı jönindegi Halıqaralıq federaciya prezidenti Dimitriya Hristopolus (Dimitris Christopoulous) särsenbi küni: "Nabiel' Radjap eşqanday qılmısker emes, ol belgili qwqıq qorğauşı jäne sayasi belsendi. Onıñ osınday sebeppen ayıptaluı azamattıq qoğamnıñ erkin ömir süruine joldı jauıp, Bahreyndegi halıqtıñ erkin şeruge şığuına kedergi keltiredi", - dedi.

Ol öziniñ wyımı atınan Bahreyn ükimetinen "Radjaptı jäne qamaudağı basqa da belsendilerdi tez arada türmeden şığarudı" talap etti.

Adamdı qinauğa qarsı halıqaralıq wyım da sottıñ şeşimin "ädilettilikti taptau" dep bağaladı. Wyımnıñ baspasöz hatşısı Djeral'd Stabrok (Gerald Staberock): "Sayasi belsendilerdiñ soñına osılay memlekettiñ tüsui Bahreyn halqınıñ auzına qaqpaq boluğa tırısu äreketi. Bwl ayaqtalu kerek", - dedi.

2016 jıldıñ mausımınan bastap Radjap densaulıq jağdayına qaramastan, "jalğız" kamerağa ornalastırılğan.

Adam qwqıqtarı jönindegi wyım Radjaptıñ sot otırısı 20 ret keyinge şegerilgenin jäne ükimet zañgerlerge öz qorğaluşısın qorğauğa mümkindik bermey, sot proceduraların bwzğanın jazdı.

Radjap eldegi şiitter (sünnitterge qarağanda köp) men sünnit ükimet basqaratın aral arasındağı böliniske qarsı bolğan. Sol közqarasın aşıq bildirgeni üşin onı 2012, 2014 jıldarı eki ret türmege qamaldı. 2016 jıldıñ şildesinen beri ol üşinşi ret türmede otır.

2011 jıldan bastap el aumağında şiitterge qarsı narazılıq (şiitter oppoziciyasın köbisi Tehran ügit-nasihatınıñ nätijesi dep oylaydı) şeruleri köbeyip ketti. Oğan  bilik basında 2 ğasır otırğan Al'-Halifa otbası atınan Saud Arabiyası aralasudı jön kördi.

Ereuilşiler prem'er-ministr saylap, "nağız" konstituciyalıq monarhiya qwratınday reforma qabıldaudı talap etude.

Al Saud Arabiya aymaqtağı bäsekelesi Irandı "şiit qoğamın Bahreynniñ sünnit basşılarına qarsı qoydı" dep kinälauda.

Parsı şığanağındağı sünnit basqaruşı elderi (birinşi kezekte: Saud Arabiyası, Kuveyt, Katar jäne Birikken Arab ämirlikteri) "şiit-irandıq" qauipten seskenedi. Saddam Huseynniñ köpjıldıq sünnit rejiminen keyin 2003 jılı Irakqa batıstıñ aralasuı kömegimen bilik basına şiitter kelgenin eskersek, "mwsılman-bauırlar" (sünnitter) basqaratın Iordaniya jäne Mısır siyaqtı elder de bwl qauiptiñ şındıqqa aynaluınan qorqadı.

“The Qazaq Times”