Qıtay qorğanındağı turister. Foto; Vision Times.

Qıtay ükimeti eldiñ işki aymaqtarında şetelge şığatın qıtaylıqtarğa barınşa jağday jasap otır. Ötken bir jılda işki Qıtaydan şetelge şıqqan adam sanı 60 mln adamğa jetip, şetelde qwrılğan qıtaylıq käsiporındar 30 mıñnan asqan. Bwğan qosa, şetelderde jwmıs istep jatqan qıtaylıqtar 1 mln adam bolsa, studentter 1 mln 370 mıñ adamdı qwrağan. Bwl turalı «People» basılımı habarladı.

Eki kün bwrın Beyjiñde ötken baspasöz mäslihatı kezinde, Qıtay SİM-iniñ konsuldıq qızmetiniñ jetekşisi Go Şauçün: «Qazir el azamattarına 65 elge vizasız qatınauğa jağday jasaldı. Sonıñ işinde 10 elge twraqtı vizasız rejim ornattıq, jaqında tağı eki el qosıladı. Al, 40 memleketpen qıtaylıqtardıñ şekaradan ötkennen keyin viza alu kelisimin qolğa keltirdik. 16 eldiñ ükimetimen Qıtay azamattarına bir bağıtta (şekaradan şığu nemese kiru kezinde) viza alu kelisimin jasadıq. Oğan qosa, 41 elmen viza mäselesin jeñildettik», – degen mälimet jasadı.

Qıtay biligi el işindegi azamattarınıñ şetelge şığuın jeñildetuimen birge, şeteldegi Qıtay elşilikteriniñ sol elge barğan qıtaylıqtarğa qızmet körsetuin kemeldendire tüspek. Olardıñ şeteldegi Qıtay elşiligi arqılı qwjat bitiru qarajatın jeñildetip, elektrondı ötiniş beru, pasportı joğalğan jağdayda elektrondı ötiniş arqılı pasport jasatu sındı jaña qızmet türlerin qosqan.

Qıtay biliginiñ bwl qadamı eldegi halıq sanımen qatar ösken äleumettik tağı basqa da problemalardı şeşu jolı retinde jasauda. YAğni, bwl qıtaydıñ «Adam eksportı sayasatı» deuge boladı. Öndiris quatı damığanımen qorşağan ortası men şikizat tapşılığı, azıq-tülik qauipsizdiginen tuındağan qiınşılıqtar aldında tek tauar eksportı Qıtaydı asırauğa qabiletsizdigin tanığan qazirgi bilik, eldegi halıqtı türli joldarmen sırtqa şığaruğa tırısuda. Ol üşin şetelderde käsiporındar men ortalıqtardı köptep qwruda. Sol eldiñ aqparattıq sayttarınıñ körsetuinşe, soñğı bes jılda Qıtaydan şamamen 150 mln adam şetelge ketken.

“The Qazaq Times”