Qarağandı mektepterinde kadr tapşı. Jalaqı mardımsız bolğandıqtan, jas mamandar  wzaq twraqtamaydı. Tığırıqtan şığu üşin bilim mekemeleri zeynetkerlerdiñ kömegine jüginuge mäjbür, dep habarlaydı Astana telearnası.

Telearnanıñ mälimetinşe, qazirdiñ özinde qalada ärtürli pänder men bastauış sınıptarğa 400-ge tarta mwğalim jetispeydi. Pedagogtar ükimetten kadr tapşılığın joyu üşin jas wstazdardıñ jalaqısın köterip, äleumettik jeñildikter jasaudı swraydı.

Qarağandıdağı №101 mektep-liceyinde jwmıs istep qwrmetti demalısqa şıqqan Ol'ga Em artınşa mektepten şaqırtu alğanın aytadı. Biraz oylanıp, jartı kün jwmıs isteuge kelisken. Qazir ol qaladağı liceylerdiñ birinde himiya päninen sabaq beredi.

"Alğaşında üyde demalam dep oyladım. Biraq mektepke şaqırğan soñ, otbasımmen aqıldasıp, aqırı jwmısqa şıqtım. Bir jağınan aqşa da artıq bolmaydı. Endi jastar kelgisi kelmese, biz sekildi zeynetkerler kömektespesek, balalardı kim oqıtadı?", - deydi zeynetker.

Atalğan mektepke matematika, himiya, biologiya, geografiya jäne orıs tili pänderi men bastauış sınıp mwğalimderi qajet. Sondıqtan basşılıq birneşe zeynetkerdi jwmısqa alğan. Olar pedagogikalıq qwramnıñ 15 payızına juıq. Mäsele mardımsız jalaqıda, degen mektep direktorı, kolledj bitirgen jas mamanğa tiesili jalaqı 30 mıñ teñgeden säl-aq joğarı ekenin aytadı. Al universitet tämamdağan mwğalimniñ aylığı 50 mıñ teñgeden asadı.

"Twrmıstıq jağdaylarına aqşanıñ jetispeuşiligine baylanıstı jıl basınan beri 3 maman ketti. Bireu geografiya päni mwğalimi, ekeui bastauış sınıp mwğalimi. Eger biz jılına 5-6 jas maman alatın bolsaq, onıñ işinde twraqtap qalatını 50 payızı", - deydi Qarağandı qalası №101 mektep-liceyiniñ direktorı Rahat Qaztev.

Ayta keteyik, kadr tapşılığı bayqalıp otırğan öñir tek Qarağandı ğana emes. Mısalı osı jıldıñ basında Almatı oblısınıñ auıldarınıñ birinde joğarı bilimi joq mwğaimderdiñ sabaq berip jügenine qatıstı dau tuındağan. Mektep direktorı bolsa pedagogtar jetispeuşiliginen osınday qadamdar jasalıp otırğanın aytqan.

Bwdan bölek Astana qalasınıñ äkimi Äset Isekeşev te mektepterde mwğalimderdiñ jetispeytinin mälimdegen edi.

“The Qazaq Times”