كوروناۆيرۋس دەرتى تىركەلگەن ەلدەردىڭ كارتاسى. فوتو: ۆloomberg سايتىنان سكرين-قيىندى

الەم حالقىن ەلەڭدەتكەن كوروناۆيرۋس ىندەتىن جۇقتىرعاندار سانى 64 483-گە، ال كوز جۇمعاندار قاتارى 1383-گە جەتتى.

قحر-دىڭ دەنسۋلىق ساقتاۋ جانە گيگيەنا ماسەلەلەرى مەملەكەتتىك كوميتەتىنىڭ دەرەگىنشە، دەرتتەن 6723 ادام ايىققان. 10 مىڭنان استام ناۋقاسپەن قاتىناستا بولعان 493 مىڭ ادامنىڭ 178 مىڭى قاتاڭ مەديتسينالىق باقىلاۋعا الىنىپتى.

Global Times باسىلىمى تاراتقان حابارعا قاراعاندا، كەشە، 13 اقپان قىتايدا 121 ۆيرۋس قۇربانى تىركەلىپ، 5090 ادامنىڭ اۋرۋ جۇقتىرعانى راستالدى.

دۇنيەجۇزىلىك دەنساۋلىق ساقتاۋ ۇيىمى مەن فلوريدا شتاتىنداعى ۋنيۆەرسيتەتتىك ينفەكتسيالىق اۋرۋلار ستاتيستيكاسى ورتالىعىنىڭ جەتەكشىسى، ساراپشى ايرا ءلونجينيدىڭ بولجاۋىنشا, «ادامزاتتىڭ جاۋى» اتانعان كوروناۆيرۋس دەرتىنەن جەر جۇرتشىلىعىنىڭ 3/1-ءى زارداپ شەگۋى مۇمكىن دەسەدى.

«ادامنان ادامعا جۇعۋ جولىن تويتارماساق، جاي باقىلاۋ جانە تاراتپاۋ ءادىسى ايتارلىقتاي ناتيجەگە جەتكىزە قويۋى نەعايبىل. وقاشاۋلاۋ مەن كارانتين ۆيرۋستى توقتاتۋعا قاۋقارسىز»، – دەيدى عالىم.

Global Times حابارلاعانداي، ۋحان قالاسىنداعى ورتالىق اۋرۋحانانىڭ باسشىسى چجان دينيۋ ايىققان ادامنىڭ بويىندا ۆيرۋسقا قارسى كۇرەسەتىن انتيتەل جيىنتىعى كوبىرەك بولاتىنىن مالىمدەدى. قانعا پلازمالىق قوسپا قۇيۋ ارقىلى ەمدەۋ ادىسىمەن قازىرگى تاڭدا 10 شاقتى اۋىر جاعدايداعى ناۋقاس وڭالىپ كەلە جاتقان كورىنەدى.

“The Qazaq Times”