ااك-ءنى ىعىستىرۋى مۇمكىن جاڭا جاردەماقى: كوپبالالى وتباسىلاردى «باسقاشا» جارىلقاۋ

قر ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە,  2020 جىلدان باستاپ  340 مىڭنان استام كوپبالالى وتباسى مەملەكەتتىك جاردەماقىعا ۇمىتكەر بولا الادى. جاڭا مەملەكەتتىك جاردەماقى قازىرگى ااك-ءنىڭ جالپى شىعىنىن ۇنەمدەۋدىڭ ساياسي ءادىسى مە؟

ايتا كەتەرلىگى، اتالعان جاردەماقى ەنگىزىلگەن كەزدە قازاقستانداعى كوپبالالى وتباسىلار سانىنىڭ ارتۋىنا بايلانىستى بۇل تولەمدى الۋشىلار سانى دا ارتۋى مۇمكىن.

«تاياۋدا ەڭبەك مينيسترلىگى ءتيىستى زاڭ جوباسىن پارلامەنتتىڭ قاراۋىنا ەنگىزۋدى جوسپارلاپ وتىر. جوعارىدا اتالعان مەملەكەتتىك جاردەماقى 4 نەمەسە ودان دا كوپ كامەلەتكە تولماعان نەمەسە 23 جاسقا دەيىنگى كۇندىزگى بولىمدە وقيتىن بالالارى بار بارلىق كوپبالالى وتباسىلارعا تابىسىنا قاراماستان تولەنەدى دەپ جوسپارلانۋدا. مەملەكەتتىك جاردەماقىنىڭ مولشەرى بالا سانىنا قاراي سارالانادى. ياعني، 4 بالاسى بار وتباسىلارعا 42 500 تەڭگە، 5 بالاعا – 53 125 تەڭگە، 6 بالاعا – 63 750 تەڭگە، 7 جانە ودان دا كوپ بالالارعا 74 375 تەڭگە تولەنەدى»، – دەلىنگەن مينيسترلىك مالىمدەمەسىندە.

بۇدان بۇرىن حابارلانعانداي، وسى جىلدىڭ 7 قازانىنداعى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ قازاقستاندا 2020 جىلعى 1 قاڭتاردان باستاپ ەنگىزۋ جوسپارلانىپ وتىرعان ااك كورسەتۋدىڭ جاڭا تەتىكتەرىن تانىستىرعان بولاتىن. ااك تابىسى از وتباسىلارعا، سونىڭ ىشىندە كوپبالالى وتباسىلارعا تولەنەتىن بولادى.

ەڭ تومەن كۇنكورىس دەڭگەيىنىڭ 70%-ى تاعايىنداۋدىڭ شەكتى كريتەريى بولىپ قالا بەرەدى. ەگەر ەڭبەككە قابىلەتتى وتباسى مۇشەسى ۇسىنىلعان جۇمىستان جانە جۇمىسپەن قامتۋعا جاردەمدەسۋ شارالارىنان باس تارتسا، وندا ااك تولەمى تەك وعان عانا ەمەس، بۇكىل وتباسىنا دا توقتاتىلماق. تابىسى از وتباسىلاردان شىققان بالالار ءۇشىن كەپىلدەندىرىلگەن الەۋمەتتىك پاكەتتى ەنگىزۋ ۇسىنىلادى دەيدى.

1 جاستان 6 جاسقا دەيىنگى بالالاردى ازىق-تۇلىك جيىنتىعىمەن جانە گيگيەنالىق قۇرالدارمەن، 6 جاستان 18 جاسقا دەيىنگى بالالاردى مەكتەپتەردە ىستىق تاماقپەن، وقۋ قۇرالدارىمەن جانە مەكتەپ كيىمىمەن قامتاماسىز ەتىلىپ، سونداي-اق ولارعا مەكتەپكە دەيىنگى جول ءجۇرۋ شىعىندارى وتەلەدى-ءمىس.

مەديتسينالىق، ونىڭ ىشىندە ستوماتولوگيالىق كومەك 18 جاسقا دەيىنگى بالالارعا تەگىن مەديتسينالىق كومەكتىڭ كەپىلدىك بەرىلگەن كولەمى جانە مىندەتتى الەۋمەتتىك مەديتسينالىق ساقتاندىرۋ اياسىندا كورسەتىلەدى دەسەدى.

بۇل ماسەلەگە قاتىستى تاۋەلسىز ساراپشىلار  «جاڭا مەملەكەتتىك جاردەماقى ۇلگىسى» بيلىكتىڭ 21 مىڭ تەڭگەنى قۇرايتىن قازىرگى ااك-ءنىڭ شىعىنىن قىسقارتۋ ءۇشىن ويلاپ تاپقان «تەتىگى» ەكەنىن ايتادى. ءار بالاعا 21 مىڭ تەڭگە الىپ وتىرعان وتباسىلارعا قوسىمشا تابىسىنا قاراماي بەرىلەتىن اتالمىش جاردەماقى جالپى تابىس ەسەبىنە ەنگىزىلىپ، تيىسىنشە توقساندىق تابىس مونيتورينگىندە شەكتى كورسەتكىشتەن ارتتىرۋ ءۇشىن «ازىرلەنگەن ءادىس» دەيدى كەيبىر بەلسەندىلەر. وسى ارقىلى جان باسىنا شاققاندا تابىسى 21 مىڭنان اسقاندا ااك تولەمى توقتاتىلاتىنىن ايتادى.

ءاۋ باستا-اق مينيسترلىك «مەملەكەتتىك اتاۋلى الەۋمەتتىك كومەك تۋرالى» قر زاڭىن باسشىلىققا الا وتىرىپ، الدىن-الا تاۋەكەلدەر مەن «الاياقتىق» قاۋىپتەرىن بولجاپ، تيىسىنشە كەشەندى نۇسقاۋلىق ازىرلەۋى قاجەت ەدى. قۇقىقتىق ساۋاتى ارتىپ، ءوز ۇلەسىن ءارى ازاماتتىق حاقىن تالاپ ەتە باستاعان بۇقارانى جاپپاي «ماسىلعا» بالاپ، شۋلى مالىمدەمەلەر جاساپ جۇرگەن شەنەۋنىكتەر مەن اكىم-قارالار قوعاممەن ديالوگ قۇرۋعا تالپىنعان توقاەۆ ساياساتىنا كولەڭكەسىن ءتۇسىرۋى ىقتيمال. دەمەك، الداعى ۋاقىتتا جاڭا مەملەكەتتىك جاردەماقىنىڭ قوعام تالقىسىنا، ازاماتتىق بەلسەندىلەردىڭ ساراپشىلىق سۇزگىسىنە ءتۇسىپ، ءالى تالاي ءسوز بولاتىنى انىق.

"The Qazaq Times"