قر اۋە تاسىمالى ەرەجەلەرىنە وزگەرىستەر ەنگىزىلدى

قر ينۆەستيتسيالار جانە دامۋ مينيسترلىگى ازاماتتىق اۆياتسيا كوميتەتى اۋە كەمەسىندە ەرەجە بۇزعان جولاۋشىلارعا قانداي شارالار قولدانىلاتىنىن جاريالادى.

اتالعان مەكەمەنىڭ حابارلاۋىنشا، ۇشاق تاسىمالىنىڭ قىزاتىن ۋاقىتى تاياپ كەلەدى: كوپتەگەن ازاماتتار دەمالىسقا شىعىپ، جولاۋشىلار تاسىمالى ەسەلەنبەك. «كەيدە اۋە كەمەسىندە ۇشاق ەرەجەلەرىنە باعىنبايتىن جولاۋشىلار تابىلىپ جاتادى. ونداي تۇلعالاردىڭ ءىس-ارەكەتتەرى ۇشۋ قاۋىپسىزدىگىنە كەرى اسەر ەتۋى مۇمكىن. سونىمەن قاتار، ولار وزگە دە جولاۋشىلار مەن ەكيپاج مۇشەلەرىنىڭ ءومىرى مەن دەنساۋلىقتارىنا قاۋىپ توندىرەدى»، - دەپ مالىمدەگەن كوميتەت قانداي شارالار ەنگىزىلەنىن دە جاريالادى.

كوميتەتتىڭ حابارلاۋىنشا، ۇشاق اۋەگە كوتەرىلەر كەزدە جانە قونار الدىندا جولاۋشىلارعا ۇشاق ىشىندە ورىندارىنان تۇرۋعا، جۇرۋگە تيىم سالىنعان. ەندى وسى ەرەجەنى بۇزعان جولاۋشىلارعا ءۇش ايلىق ەسەپتىك كورسەتكىش كولەمىندە ($22) ايىپپۇل سالىنادى. ال اۋە كەمەسىندە شىلىم شەككەن جولاۋشىلارعا 200 اەك (ايلىق-ەسەپتىك كورسەتكىش) كولەمىندە ايىپپۇل ($1480) سالىنادى نەمەسە 15 كۇنگە دەيىن اكىمشىلىك تۇتقىنعا الىنادى.

ەكيپاج مۇشەلەرى مەن وزگە دە جولاۋشىلاردىڭ ومىرىنە، دەنساۋلىعىنا قاۋىپ توندىرەتىن نەمەسە ولاردىڭ ار-نامىسىنا تيەتىن جاعدايلار تۋىنداتقان جولاۋشىلارعا دا ءدال وسىنداي ايىپپۇل سالىنباق.

سونىمەن قاتار، ۇشاق ىشىندە وزگە تۇلعالارعا ءتىل ءتيىزىپ، كۇش كورسەتكەن جولاۋشىلارعا 10 اەك ($74) ايىپپۇل سالىنىپ نەمەسە 10 تاۋلىككە اكىمشىلىك قاماۋعا الىنادى.

ۇشاقتاعى مۇلىككە قاساقانا زالال كەلتىرۋ جانە (نەمەسە) ونى اۋە كەمەسىنەن الىپ كەتۋگە تىرىسۋ ارەكەتتەرىنە، سونداي-اق ۇشقىش كابيناسىنا كىرۋگە تىرىسۋ ارەكەتتەرىنە 200 اەك ايىپپۇل نەمەسە 15 تاۋلىككە اكىمشىلىك تۇتقىنعا الىنادى»، - دەپ حابارلايدى كوميتەت.

“The Qazaq Times”