Qıtay basşısı Bükil qıtaylıq qwrıltayda bayandama jasadı. foto: news.ifeng.com.

Qıtay basşısı Şi Jinpiñ Bükil qıtaylıq halıq qwrıltayında söylegen sözinde «Qıtaydı tek qana socializm qwtqaradı» degen oyın ortağa saldı. Ol jäne memleket ekonomikası men özge damu körsetkişteriniñ öz orının saqtap twrğanın ayta kelip, eldiñ twtastığı turalı köbirek söz etti. Ol bwl taqırıptağı sözinde Tayuannıñ (Tayvan') Qıtaydan bölinuge äreket etip jatqanın sınğa aldı. Bwl turalı BBC-diñ resmi saytı habarlaydı.

Qıtay basşısınıñ kezekti söylegen sözinde, eldiñ qazirgi damu bağıtı, aldağı mindetter men jaña bağıttar, Qıtaydıñ jahandıq ambiciyası, sonday-aq, älem aldındağı mindeti degen sekildi taqırıptarğa toqtaldı. Ol Qıtaydıñ quattı el boluğa tırısatının, biraq agresivti bolmaytının basa ayttı. Aytalıq, Qıtay basqa elderdiñ müddesin özine paydalanbaydı degen oydı alğa tarttı.

Şi Jinpiñ «Ülken Qıtay» sayasatı turalı söylegen sözinde, Tayuan, Gonkong, Tibet öñirlerin köbirek atap ötti. Ol: «Beyjiñniñ bölşekteuşilerdiñ äreketin toqtatuğa qwdireti jetedi. Qıtay halqınıñ bir ğana senimi bar – quattı memleketimizdiñ bir twtam jerin eşkim bölip äkete almaydı», – dedi.

Tayuan - Beyjiñ biliginiñ eñ sezimtal taqırıptarınıñ biri. Tayuan aralı Qıtaydıñ menşigi dep moyındau barlıq eldermen jasasqan diplomatiyalıq kelisiminiñ alğışartı bolıp keledi. Jaqında AQŞ jaña zañ qabıldap, Tayuannıñ joğarı därejeli ökilderin jekeley qabıldauğa jol aştı. Al Beyjiñ tarabı Tayuanmen qarım-qatınas ornatqısı keletin kez-kelgen eldi, aldımen öziniñ rwqsatın aluı kerek dep sanaydı.

Şi Jinpiñnen keyin söz alğan eldiñ prem'eri Li Kıçyañ resmi Beyjiñniñ ekonomikalıq tärtipti qatañ saqtaytını, özge eldermen ıntımaqtasudı qalaytının bildirdi. Ol jäne älemdik sauda jelisiniñ barlıq elge payda keltiretinin ayta kelip, Qıtaydıñ aldağı jerde otandıq jäne şeteldik kompaniyalarğa birdey jağday jasaytının alğa tarttı. Bwnısı Qıtay ekonomkasınıñ osığan deyin narıqtıq ekonomika retinde bağalanbay keluine qarata aytılğanı anıq. Sebebi, AQŞ bastağan birqatar Batıs elderi Qıtay ükimetiniñ otandıq kompaniyalardı kötermelep, şeteldik käsipkerlerge qısım jasaytının ayıptağan bolatın.

“The Qazaq Times”