قازاقستاننىڭ باس پروكۋرورى بەرىك اسىلوۆ بيىل پارلامەنت مىنبەرىندە جاساعان بايانداماسىندا قاڭتار وقيعاسىندا الماتىدا اۋەجايعا بارعان ايگەرىم تىلەۋجاننىڭ كونستيتۋتسيالىق قۇقىعى – كىناسىزدىك پرەزۋمپتسياسىن بۇزىپ، سوت ۇكىمىنسىز ونى «ءدىني ەكسترەميستىك ۇيىمداردىڭ مۇشەسى» دەپ ايىپتاي مالىمدەگەن.

ايگەرىم تىلەۋجان مەن قالاس نۇرپەيىسوۆتى الماتى اۋەجايىن باسىپ الۋدى ۇيىمداستىرۋشى دەگەن. بۇل جونىندە تىلەۋجاننىڭ ادۆوكاتى اينارا ايدارحان ءتيىستى مەكەمەلەرگە، ءتىپتى سەناتقا شاعىم تۇسىرگەن.

سونداي-اق، باس پروكۋروردىڭ سۋديا رولىندە تاراتقان ء[ىس سوتقا جولدانباستان بۇرىنعى] اقپاراتىنا نارازى بەلسەندى ازاماتتار  20 قاڭتاردا «باس پروكۋرور بەرىك اسىلوۆ قىزمەتىنەن كەتسىن» دەگەن ونلاين پەتيتسيا جاريالاعان.

كونستيتۋتسيانىڭ 77-بابىندا «ادامنىڭ كىنالى ەكەندىگى زاڭدى كۇشىنە ەنگەن سوت ۇكىمىمەن تانىلعانشا ول جاسالعان قىلمىسقا كىنالى ەمەس دەپ ەسەپتەلەدى» دەپ ناقتى كورسەتىلگەن. ساراپشىلار باس پروكۋرور اسىلوۆتىڭ باق وكىلدەرىن پايدالانا وتىرىپ وسى زاڭدى بۇزعانىن ورەسكەل، جاۋاپكەرشىلىككە تارتىلۋى ءتيىس قاتە ارەكەت دەپ باعالايدى.

جۋرناليست ايگەرىم تىلەۋجان مەن تاريحشى-پەداگوگ قالاس نۇرپەيىسوۆ قاڭتار وقيعاسى بايلانىستى «اۋەجايدى باسىپ الماق بولدى» دەگەن كۇدىككە ىلىنگەن.  ايگەرىم تىلەۋجان دا، نۇرپەيىسوۆ تە سول كۇنى اۋەجايعا بارعانىن مويىنداعان، بىراق تەرگەۋ تاققان ايىپتاردى جوققا شىعاردى.

The Qazaq Times