فوتو: baribar.kz

حح عاسىر مەن ءححى عاسىردى سالىستىرۋعا بولمايدى. الەمدىك دەڭگەيدە الىپ قاراساق، ءححى عاسىردىڭ العاشقى جيىرما جىلى الەم حالىقتارىنىڭ ءبىر-بىرىنە ىقىلاستانۋى، كومەك قولىن سوزۋى، مۇمكىندىگىنشە وزدەرىنىڭ جاقسى تۇستارىن كورسەتىپ، سونى ۇيرەنۋى، مەملەكەتتىك تۇرعىدا ينتەگراتسياعا كىرۋ جاعىنان جاعدايدىڭ قانشالىقتا دامىعانىن بايقاۋعا بولادى. مىنە، وسى تاجىريبەگە سۇيەنىپ، الەم حالىقتارىنىڭ ءبىر-بىرىمەن تىعىز بايلانىسقا شىقپاي، ءبىر-بىرىنە دەگەن قامقورلىق نيەتپەن ارالاسپاسا، وركەنيەتتىڭ العا باسپايتىنى انىق.

سونىڭ ءبىر بولشەگى بولىپ ەسەپتەلەتىن، الەمدىك دەڭگەيدە وركەنيەتتى ەلدىڭ ءبىرى رەتىندە تانىلعان ءبىزدىڭ ەل، ياعني قازاقستان مەملەكەتىندە بەيبىتشىلىك، تىنىشتىق تۇرعىسىنان جاقسى قادامدار جاسالىپ جاتىر. ونىڭ نەگىزى جىلدا وتكىزىلىپ جاتقان ادامزاتتىققا ارنالعان رەسپۋبليكالىق قانا ەمەس حالىقارالىق اۋقىمدى كولەمدەگى فورۋمدار، كونفەرەنتسيالار، باسقوسۋلار وسىنىڭ بىردەن-ءبىر ايعاعى. مىسالى، جاقىندا عانا ەلوردادا الەمدىك جانە ءداستۇرلى دىندەر ليدەرلەرىنىڭ VII سەزى ءوتتى. وعان قاتىسقان ريم پاپاسى فرانتسيسك قازاقتىڭ ۇلى فيلوسوفى ابايدىڭ ويلارىن مىسالعا كەلتىرە وتىرىپ، قازىرگى الەمدەگى ءدىننىڭ ماڭىزى مەن قاجەتتىلىگىن ايتتى. سوزبە ءسوز ايتساق، «ادام ماڭگىلىك ەمەس. سوندىقتان ءبىز ەكونوميكالىق سۇرانىستاردى قاناعاتتاندىرۋ ءۇشىن عانا ەمەس، رۋحاني دۇنيەنى بايىتۋمەن دە اينالىسۋىمىز كەرەك. الەمدەگى ادامداردى رۋحاني قاسيەتتەر بىرىكتىرسە عانا الەمدە بىرلىك ورنايدى. بۇل جايلى قازاقتىڭ ۇلى ويشىلى اباي دا ايتىپ كەتكەن. اباي، ەڭ الدىمەن، ادام بولۋ قاجەت دەگەن دانالىق باعىتتى ۇستاندى» دەگەن ەدى ريم پاپاسى.

جالپى، تەگىمىز تۇركى حالقى بولعاندىقتان،  ىشتەي تۇركى حالىقتارىنىڭ باسىن بىرىككەنىن قالاپ تۇرامىز. ال قازاق ەلىنىڭ ۇستاناتىن پوزيتسياسى – بىرلىك، تۇتاستىق. ويتكەنى ءبىز ءوزىمىزدى الىپ بايتەرەككە تەڭەسەك، تۇركى حالقى تامىرىنا ءنار بەرىپ وتىرعان بۇتاعى. ال ونىڭ جايقالىپ، ءوسۋى – اۋىزبىرشىلىكتىڭ ارقاسى. سوندىقتان ءبىر بايتەرەكتىڭ ءبىر باسىندا تامىرى، بۇتاعى ءدىنى، جاپىراعى ءبارىنىڭ ءوزىنىڭ اتقاراتىن مىندەتى بار. سول سەبەپتى، ءبىز ەشقاشان ءبولىنىپ، جارىلماۋىمىز كەرەك. «بولىنگەندى ءبورى جەيدى» دەگەندەي، بولىنگەننەن گورى، بىرىككەنىمىز دۇرىس. سونىڭ ءبىر كورىنىسى رەتىندە ەلىمىزدە ازياداعى ءوزارا ءىس-قيمىل جانە سەنىم شارالارى جونىندەگى كەڭەستىڭ ءVى ءسامميتى باستالدى. سول جەردە پرەزيدەنتىمىز قاسىم-جومارت توقاەۆ «بۇگىن ءبىز بۇرىن-سوڭدى بولماعان گەوساياسي شيەلەنىس پەن الەمدىك ەكونوميكاداعى كۇشەيە تۇسكەن داعدارىس جاعدايىندا ءومىر ءسۇرىپ جاتىرمىز. ءبىزدىڭ الدىمىزدا تۇرعان ماڭىزدى مىندەت – تۋىنداعان زور قاۋىپ-قاتەرلەر جاعدايىندا حالىقارالىق قاتىناستارداعى تۇراقتىلىققا قول جەتكىزۋ. كوپجاقتى مەحانيزمدەرگە تىڭ سەرپىن بەرۋ جانە اشىق ديالوگقا ورالۋ اسا ماڭىزدى» دەپ ءوزىن مىقتى ديپلومات رەتىندە كورسەتە ءبىلدى.

استانادا الەمدىك جانە ءداستۇرلى دىندەر كوشباسشىلارىنىڭ سەزى ءوتۋى، وعان ريم پاپاسىنىڭ كەلۋى، كوپ ۇزاماي، تاعى ءبىر ەلەۋلى شارا – ازياداعى ءوزارا ءىس-قيمىل جانە سەنىم شارالارى جونىندەگى ءسامميتتىڭ باستالۋى  – وسىنىڭ ءبىر ناقتى دالەلى.

«بىرلىك بار جەردە، تىرلىك بار» دەگەندەي حالىقارالىق قاتىناستاردا مۇمكىندىگىنشە تۇسىنىستىكپەن سويلەسۋ، ماسەلەنى كەلىسىممەن شەشۋدى جولعا قويعانبىز. سوندىقتان قازاق ەلىنىڭ بولاشاعى نۇرلى بولادى دەپ سەنەمىن. سەبەبى، ءوزىمىز بەيبىتسۇيگىش حالىقپىز. ونىڭ ۇستىنە،  قازاقعىمىزدىڭ بۇگىنگى ءوسىپ كەلە جاتقان جاس ۇرپاعى وتە سەزىمتال، العىر، قابىلەتتى جاستار. ولارعا ارتقان ءۇمىتىمىز دە زور.