ليۆەرپۋل ءسامميتى. فوتو: AFP

اپتا سوڭىندا بريتانيانىڭ ليۆەرپۋل قالاسىندا «ۇلكەن جەتىلىك» (G7) ەلدەرىنىڭ سىرتقى ىستەر مينيسترلەرى باس قوستى. كەزدەسۋدە باستى تاقىرىپ ەتىپ رەسەيدىڭ ۋكراينا شەكاراسىنا جاقىن اسكەر توپتاعان ارەكەتىن تالقىلادى. سوڭىندا رەسەيگە ەسكەرتۋ جاساۋمەن تاراستى.

«ۇلكەن جەتىلىككە» كىرەتىن اقش، بريتانيا، كانادا، گەرمانيا، فرانتسيا، يتاليا جانە جاپونيا ءسىم باسشىلارى اراسىنداعى كەزدەسۋ ەكى كۇنگە سوزىلدى. تاراپتار ورتاق باس قوسۋدان قاتار G7 قۇرامىنداعى ەلدەر اراسىندا جەكەلەگەن دە كەزدەسۋلەر ءوتتى. ايتالىق، اقش مەملەكەتتىك حاتشىسى مەن جاپونيانىڭ جاڭا سىرتقى ىستەر ءۋازىرى كەزدەسىپ قىتايدىڭ ءۇندى-تىنىق مۇحيت ايماعىنداعى ارتىپ كەلە جاتقان ىقپالى جانە سولتۇستىك كورەيانىڭ زىمىران قاتەرى سەكىلدى وزدەرىنە ورتاق ماسەلەلەردى قاراستىردى.

ال، جيىندى وتكىزىپ وتىرعان بريتاننىڭ ءسىم باسىشسى ليز تراسس ءسامميتتىڭ الدىندا امەريكالىق ارىپتەسى انتوني بلينكەنمەن كەڭەسكەن بولاتىن. جيىن كەزىندە ول قازىرگى جاھاندىق گەوساياسي قيىندىقتارعا توقتالا وتىرىپ، «ۇلكەن جەتىلىك» ەلدەرىن رەسەي، قىتاي جانە يرانعا قارسى بىرلەسۋگە شاقىردى.

G7 ەلدەرى ءسىم جەتەكشىلەرىنىڭ كەزەكتى باس قوسۋىندا بەيجىڭ قىسقى وليمپيادا ويىندارىنا ديپلوماتيالىق بايكوت جاريالاۋ ماسەلەسىدە كۇن تارتىپتە بولدى. بۇعان دەيىن اقش، بريتانيا، اۋستراليا جانە كانادا سەكىلدى اعىلشىن وداعى قىتايداعى سپورتتىق دورداعا ديپلوماتيالىق بايكود جاريالاعان ەدى.

الداعى ۋاقىتتا «بەس كوز» ەلدەرىنىڭ سوڭعىسى جاڭا زەلانديا دا وسى قادامدى قايتالاۋى مۇمكىن. الايدا، فرانتسيا بايكوت جاريالاۋعا قارسىلىعىن بىلدىرگەن.

سامميتتەن كەيىن «ۇلكەن جەتىلىك» ۋكراينا شەكاراسىنداعى جاعدايعا بايلانىستى رەسەيگە ەسكەرتۋ جاساپ، اسكەر توپتاۋدى قىسقارتۋىن تالاپ ەتتى. ەگەر رەسەي بۇل تالاپتى ەسكەرمەسە «كەڭ اۋقىمدى» دەپ اتالاتىن ەكونوميكالىق سانكتسياعا تۇس كەلۋى مۇمكىن ەكەنىن ءبىلدىردى.

The Qazaq Times