"تاليبان" جەتەكشىلەرىنىڭ ءبىرى مولدا ابدۋل عاني بارادار. فوتو: N Live,

«تاليبان» قۇرعان جاڭا ۇكىمەتتىڭ جوعارى جەتەكشىلەرى اراسىندا جانجال بولدى. اۋعانستاننىڭ جاڭا كوشباسشىلارى اراسىنداعى قايشىلىق تۋرالى بۇعان دەيىن راستالماعان مالىمەتتەر تاراعان بولاتىن، كەيىننەن ونى تالىپتەر رەسمي مالىمدەمە ارقىلى جوققا شىعارعان ەدى. الايدا، جاڭا ۇكىمەتتىڭ جوعارى جەتەكشىلەرىنىڭ ءبىرى بۇل تۋرالى راستاپ، BBC-گە مالىمەت بەرگەن.

جانجال «تاليبان» ۇيىمىن قۇرۋشىلاردىڭ ءبىرى جانە بۇعان دەيىن ۇيىمنىڭ كاتارداعى كەڭەسىن باسقارعان مولدا ابدۋل عاني بارادار مەن «حاككاني» سوعىسكەرلەر توبىنىڭ جەتەكشىسى بولىپ كەلگەن حاليل ءالراحمان حاككاني ورتاسىندا بولعان. BBC-ءدىڭ پۋشتۋم تىلىندەگى قىزمەتى حابارلاعانداي، پرەزيدەنت سارايىندا بولعان جانجالعا بارادار مەن حاككاني عانا ەمەس، ولاردىڭ جانىنداعى جاقتاستارىنا قاتىسقان.

بارادار سوڭعى كۇندەرى وسى كەلىسپەستىككە قاتىستى اقپارات قۇرالدارى مەن اشىق كەزدەسۋلەرگە شىقپاي قالعانى تۋرالى حابارلار تاراعان ەدى. مالىمەت كوزدەرىنىڭ حابارىنشا باراداردىڭ جاڭا ۇكىمەت قۇرامىنا كوڭىلى تولمايدى. اسىرەسە، حاككاني ورتاسىنداعى كەلىسپەۋشىلىك «جەڭىستى كىمنىڭ اتىنا جازۋ» ماسەلەسى بويىنشا شىقتى دەگەن مالىمەتتەر ايتىلۋدا.

بارادار مەن ونىڭ جاقتاستارى جەڭىستىڭ ءوزى سەكىلدى ديپلومات ادامداردىڭ ەڭبەگىنىڭ ناتيجەسىندە قولعا كەلدى دەسە، تالىپتەر جاعىندا ءتۇرلى قارۋلى شابۋىلداردى ۇيىمداستىرۋمەن اتى شىققان توپتىڭ جەتەكشىسى حاككاني جەڭىستى قارۋلى كۇرەس الىپ كەلدى دەگەن كوزقاراسپەن تارتىسقان.

بارادار اقش پرەزيدەنتىمەن اۋىزەكى سويلەسكەن العاشقى «تاليبان» جەتەكشىسى بولعانى بەلگىلى. بىلتىر ول دونالد ترامپپەن تەلەفون ارقىلى سويلەسكەن. سونداي-اق بارادار «تاليبان» اتىنان اقش-تىڭ اسكەرىن شىعارۋى بويىنشا كەلىسىمدەرگە قول قويعان. قازىر جاڭا ۇكىمەت قۇرامىنداعى پرەمەر-ءمينيستردىڭ ءۇش بىردەي ورىنباسارىنىڭ ءبىرى.

حاككاني توبى سوڭى جىلدارى شەتەلدىك اسكەري كۇشتەرگە قارسى شابۋىلداردى ۇيىمداستىرىپ كەلدى. قۋاتتى قارۋلى توپ اۋعانستانداعى بارلىق تەررورلىق توپتاردىڭ مىندەتتى تۇردە ساناساتىن قارۋلى كۇش رەتىندە بەلگىلى بولعان. بۇل توپتى قۇراما شتاتتار تەررورلىق ۇيىم رەتىندە تانيدى. ونىڭ جەتەكشىسى سيراجۋددين حاككاني قازىر ىشكى ىستەر ءمينيسترىنىڭ قىزمەتىن اتقارىپ تۇر.

بارادار  حاككانيمەن بولعان جانجالدان كەيىن بىرنەشە كۇن اشىق كوزگە تۇسپەي قالعاندا كەيبىر اقپارات قۇرالدارى ونى حاككاني توبى جاعىنان ولتىرىلگەن بولۋى دا مۇمكىن دەگەن بولجامدا ايتقان. بۇل تارتىس ونشا اۋقىمدى كورىنبەگەنىمەن، الداعى ۋاقىتتاعى تالىپتەردىڭ اۋعانستانداعى بيلىگىنىڭ نەگىزىگى پروبلەمالارىنىڭ ءبىرىن ايقىنداپ تۇر.

The Qazaq Times