بايدەن: اۋعانستاندىقتار ەندى وزدەرى سوعىسۋىنا تۋرا كەلەدى

اقش اسكەرلەرى اۋعانستاننان تولىق شىعۋىنا نەبارى بىرەر اپتا قالدى. تالىپتەر بولسا بارعان سايىن ىقپال اۋماعىن كەڭەيتىپ كەلەدى. ەلدە زورلىق-زومبىلىق كۇشەيىپ كەتتى. وسى تۇستا اقش پرەزيدەنتى جو بايدەن اۋعانستاننان اسكەر شىعارعانىنا وكىنبەيتىنىن مالىمدەدى.

پرەزيدەنت بايدەن اق ۇيدە جۋرناليستەر الدىندا سويلەگەن سوزىندە قۇراما شتاتتاردىڭ اۋعانستان الدىنداعى بورىشىن وتەپ بولعانىن ءبىلدىردى. بايدەن ءسوز اراسىندا اۋەدەن قولداۋ كورسەتۋ، اسكەري قىزمەتكەرلەرگە جالاقى تولەۋ، اسكەري جابدىقتار جانە ازىق تۇلىكپەن قامسىزداۋ، اۋعانستاندىق اسكەرلەرگە قولداۋ كورسەتۋ سەكىلدى كوپتەگەن جۇمىستاردىڭ اتقارىلعانىن اتاپ وتكەن. «بىراق ەندىگى جەردە ولاردىڭ وزدەرى ءۇشىن ءوزى سوعىسۋىنا تۋرا كەلەدى»، – دەيدى اقش پرەزيدەنتى.

بايدەن سولاي دەگەنمەن، اۋعانستانداعى جاعدايدىڭ ءماز ەمەس ەكەنى بەلگىلى. قازىرگە دەيىن تاراعان مالىمەتتەر بويىنشا «تاليبان» ەلدەگى 34 پروۆينتسيانىڭ 9-ىن  وزدەرىنە قاراتتى. «ۋاشينگتون پوست» باسىلىمى وسىدان ءبىر كۇن بۇرىن اتى اتالماعان جوعارى شەنەۋنىكتىڭ بەرگەن مالىمەتىنە سىلتەمە جاساپ، اقش اسكەرى شەگىنگەننەن كەيىن «تاليبان» ۇيىمى ورتالىق قالا كابۋلدى 90 كۇن ىشىندە باسىپ الۋى مۇمكىن ەكەنىن جازدى.

وتكەن ءبىر ايدا تالىپتەر مەن ۇكىمەت كۇشتەرى اراسىنداعى قاقتىعىستان قازا تاپقان بەيبىت تۇرعىنداردىڭ مىڭنان اسقانىن بۇۇ مالىمدەدى.

بۇگىنگى تاڭدا اۋعانستان ۇكىمەت كۇشتەرى تالىپتەردىڭ قورشاۋىندا تۇر. سەبەبى، «تاليبان» كۇشتەرى ەلدىڭ شەكارا اۋماقتارىن تۇگەلگە جۋىق وزىنە قاراتتى. شەكارا اتتاپ شىعىپ جاتقان بوسقىندار توقتاپ تۇر. پاكىستان، يران، تۇركىمەنستان، وزبەكستان جانە تاجىكستانمەن شەكارالاس ايماقتاردا ۇكىمەت باقىلاۋىنداعى ساناۋلى عانا شەكارا بەكەتتەرى قالدى.

“The Qazaq Times”