اۋعانستان ۇكىمەتى قىتاي، ءۇندىستان جانە رەسەيدەن لاڭكەستىككە قارسى كۇرەستە تەحنيكالىق قولداۋ سۇرادى.

وتكەن اپتادا اقش اسكەرى باگرامداعى بازادان كەتكەن بولاتىن. وسىدان كەيىن «تاليبان» قوزعالىسى بىردەن شابۋىلعا كىرىسىپ، ءبىراز جەردى باسىپ الدى. قازىر اۋعانستان ۇكىمەتىنىڭ كۇشتەرى مەن تالىپتەر اراسىندا سوعىس بولىپ جاتىر.

اۋعانستان پرەزيدەنتىنىڭ كەڭەسشىسى حامدۋللا ءموحيبتىڭ مالىمدەۋىنشە، اۋعان اسكەرى تەحنيكالىق جاعىنان قولداۋعا كۇتەدى. بىراق ول كەز كەلگەن كومەك سىرتقى كۇشتەردىڭ مەملەكەتتىڭ ىشكى ىسىنە ارالاسۋىنا جول بەرمەۋ كەرەكتىگىن ەسكەرتتى.

9 شىلدە اۋعانستان مەن تۇرىكمەنستان شەكاراسىندا اتىس بولىپ، ەلدىڭ وڭتۇستىگىندەگى كەي اۋداننان تۇرىكمەن اسكەريلەرى وتباسىلارىن ەۆاكۋاتسيالاۋعا ءماجبۇر بولعان. مالىمەتتەر بويىنشا، اتىس تۇرىكمەنستاننىڭ سەرحەتاباد مەكەنى مەن اۋعانستاننىڭ تۋرگۋندي اۋىلىندا ورىن العان.

بىرەر كۇن بۇرىن تۇركىمەنستان اۋعانستانمەن شەكاراداعى «اكينا» باقىلاۋ وتكىزۋ بەكەتىن جاپقان بولاتىن. سەبەبى تالىپتەر بەكەتكە جاقىن بىرقاتار ەلدى مەكەندى باسىپ العان.

"The Qazaq Times"