بۇگىن، الماتىداعى قر ۇلتتىق كىتاپحاناسىنىڭ ن.داۋلەتوۆا اتىنداعى وقىرمان زالىندا «ورتالىق ازياداعى گەوستراتەگيالىق پروتسەستەردىڭ دامۋ باقىتى جانە قازاقستان: ايماقتاعى قاۋىپسىزدىك جانە تۇراقتىلىق» ماسەلەلەرى اتتى عىلىمي كونفەرەنتسيا ءوتتى. كونفەرەنتسياعا وتاندىق ساياساتتانۋشىلار مەن ساراپشىلار جانە باق وكىلدەرى قاتىستى.

The Qazaq Times اقپاراتتىق، قوعامدىق-ساياسي پورتالى مەن ۇيىمداستىرعان شاراعا قر ۇلتتىق كىتاپحاناسى مەن «ەر جانىبەك» حالىقارالىق قوعامدىق قورى قولداۋ كورسەتكەن.

شارادا وتاندىق جانە شەتەلدىك ساياساتتانۋشى ساراپشىلار ورتالىق ازياعا قاتىستى گەوساياسي ماسەلەلەردى، ايماققا اسەر ەتىپ وتىرعان سىرتقى كۇشتەردىڭ ستراتەگيالىق قادامدارى قاتارلى ماسەلەلەردى تالقىلاپ، ءوز پىكىرلەرىن ورتاعا سالدى.

وفلاين جانە ونلاين فورماتتا وتكەن شارادا وتاندىق ساياساتتانۋشى ساراپشىلاردان، ءال-فارابي اتىنداعى قاز-ۇۋ-دىڭ شىعىستانۋ فاكۋلتەتىنەن ساياساتتانۋشى، قىتايتانۋشى ساراپشىلار نۇرات ءىلياس جانە  نۇرتالىپ شارىپقازى، سونداي-اق ەۆرازيالىق عىلىمي زەرتتەۋ ينستيتۋتىنىڭ عىلىمي قىزمەتكەرى ومىربەك قاناي، ەۋرازيا ۇلتتىق ۋنيۆەرسيتەتىنىڭ دوكتارانتى قانات قاھار قاتارلى ساراپشىلار قاتىستى. بۇدان تىس تۇركياداعى مۋگىلا سىتقى كوشمان ۋنيۆەرسيتەتىنىڭ پروفەسسورى، ورتا ازيا جونىندەگى كورنەكتى ساراپشىلارىنىڭ ءبىرى سەردار يلماز بەن انكاسام ساياسات پەن داعدارىستاردى زەرتتەۋ ورتالىعىنىڭ عىلىمي قىزمەتكەرى، تاريحشى، تۇركولوگ ەلدەس وردا قاتارلى ساراپشىلار قاتىستى.

كونفەرەنتسيادا سەردار يلماز، ومىربەك قاناي، قانات قاھار جانە ەستاي بوجان قاتارلى ساراپشىلار مەن جۋرناليستەر ورتالىق ازيا ەلدەرىندەگى ينتەگراتسيا ماسەلەسى، ءۇندى-تىنىق مۇحيتى ايماعىنداعى پروتسەستەردىڭ ورتالىق ازياعا ىقپالى، ايماقتاعى ەكونوميكالىق باعدارلامالار باسەكەلەستىگىنىڭ ايماققا الىپ كەلەتىن جاڭا مۇمكىندىكتەرى مەن قيىندىقتارى، سونداي-اق، ايماقتىق گەوستراتەگيالىق گەوساياسي پروتسەستەردىڭ اقپاراتتىق قاۋىپسىزدىككە جاسايتىن ىقتيمال سىن-قاتەرلەرى تاقىرىبىنداعى باياندامالار جاساپ، وڭىردەگى قازىرگى ساياسي جاعداي مەن بولاشاق تۋىنداۋى ىقتيمال قاتەرلەرگە قاتىستى ءوز پىكىرلەرىن ورتاعا سالدى.

كونفەرەنتسيانىڭ ەكىنشى بولىمىندە ساراپشىلار مەن باق وكىلدەرى ەركىن پىكىر الماسىپ، تاقىرىپقا قاتىستى سۇراق-جاۋاپ تۇرىندەگى پىكىر سايىسىن وتكىزدى. پىكىر سايىسقا تۇركيالىق ساراپشىلاردا قاتىسىپ، ايماققا ىقپال ەتۋشى كۇشتەردىڭ جاڭا قادامدارى تۋرالى تالقى ورىستەتىلدى.

شارا قورىتىندىسىندا ۇلتتىق، ەكونوميكالىق، اقپاراتتىق قاۋىپسىزدىككە قاتىستى وزەكتى ماسەلەلەر بويىنشا قۇزىرلى ورگاندار مەن مەملەكەتتىك اقپارات قۇرالدارىنا قاجەتتى ۇسىنىستار جاسالدى.

“The Qazaq Times”