يزرايل-پالەستين: «جەلەكتىلەر شەرۋى» قاقتىعىسقا جول اشۋى مۇمكىن

يەرۋساليمدە ەتنو-ارالىق قاقتىعىستىڭ وتى قايتا تۇتانۋ قاۋپىنەدە تۇر.  يزرايل ازاماتتارى 1967 جىلعى شىعىس يەرۋساليمدەگى جەڭىسىن اتاپ ءوتۋدىڭ بيىل وزگەشە فورماتىن تاڭداعان. جالاۋلارىن جەلبىرەتىپ، جاياۋ شەرۋلەتكەن ەۆرەيلەر شىعىس يرەۋساليمدى شەرۋمەن ارالاپ وتۋكە دايىندالۋدا. ەۆرەيدىڭ جاڭا بيلىگى دە جىل سايىن وتەتىن جەڭىستى اتاپ وتۋگە ماقۇل بولعان. پالەستينالىقتار جاقىندا عانا قاقتىعىس توقتاعان ەلدە بۇنداي ارەكەتتى ارانداتۋ قاتارىندا قابىل الۋدا.

1967 جىلعى يزرايل-اراب سوعىسىندا شىعىس يەرۋساليمدى جەڭىپ العان كۇندى جەبىرەي ازاماتتارى اتاۋلى كۇن رەتىندە جىل سايىن اتاپ ءوتىپ كەلەدى. «جەلەكتىلەر شەرۋ» دەپ تە اتالاتىن شارادا جەبىرەي جاستارى داماسك قاقپاسىنان تارتىپ شىعىس يەرۋساليمدەگى مۇسىلماندار تۇراتىن اۋداندارىنا دەيىن ارالاپ، بايراقتارىن كوتەرىپ، پاتريودتىق اندەرىن ايتىپ وتەدى.

اتاۋلى كۇن وتكەن بەيسەنبىدە ءوتىپ كەتتى. قاۋىپسىزدىك ماسەلەسىنە وراي پوليتسيا تارابى ول كۇندە شەرۋ وتكىزۋگە قارسى بولعاندىقتان باسقا كۇنگە اۋىستىرىلعان. قىزمەتىنەن كەتكەن پرەمەر-ءمينيسترى نەتانياحۋ ۇيىمداستىرۋشىلار مەن پوليتسيا تارابى كەلىسىمگە كەلەتىن بولسا، ۇكىمەت وسى اپتادا شەرۋدى وتكىزۋگە رۇقسات بەرەتىنىن ايتقان.

الايدا، ول قىزمەتىنە كەتىپ، شەرۋدىڭ تاعدىرى نافتالي بەننەتتيدىڭ جاڭا كواليتسياسىنىڭ قولىندا قالعان. اپتانىڭ باسىندا جاڭا ۇكىمەتتىڭ ىشكى قورعانىس ءمينيسترى ومەر بار-لەۆ شەرۋگە رۇقسات بەرىلگەنىن مالىمدەدى.

جاڭا كواليتسيانىڭ قۇرامىنداعى يسلامشىل پارتيانىڭ ليدەرى بۇعان قارسىلىق ءبىلدىرىپ مالىمدەمە جاسادى. مانسۋر ابباس شەرۋگە رۇقسات بەرۋ قاقتىعىستىڭ وتىن ۇرلەگەن ماقساتتى ساياسي شەشىم بولىپ قالادى دەپ ەسكەرتتى.

گازانىڭ رەسميلەرى دە پالەستينالىقتارعا ۇران تاستاپ، بۇل شەرۋدى توقتاتىپ قالۋعا شاقىرۋدا. جەكسەنبىدە گازادا «جەلەكتىلەر شەرۋىنە» قارسى نارازىلىق اكتسياسىدا ۇيىمداستىرىلدى.

جاقىندا عانا ەكى تاراپ ورتاسىندا 11 كۇنگە سوزىلعان قاقتىعىستان 256 پالەستينالىق، 13 يزرايلدىك قازا تاۋىپ، مىسىردىڭ ارا اعايىندىق جاساۋىمەن اتىستى ارەڭ توقتاتقان بولاتىن.

جاڭا جاعدايعا بايلانىسىت يزرايل ارمياسى جاڭا دايىندىق كۇيىنە كەلتىرىلدى. اقپارات قۇرالدارى اۋە قورعانىس جۇيەسى پالەستينا تارابىنان كەلەتىن زىمىرانداردى توسۋعا دايىن تۇرعانىن حابارلاپ جاتىر.

“The Qazaq Times”