فوتو: armeniasputnik.am

ۇندىستانداعى ەپيداحۋال كۇننەن كۇنگە كۇردەلەنىپ بارادى. كارانتين شەكتەۋلەرى قاتاڭداتىلعانمەن، ءبىر تاۋلىكتە 3800 ادام اجال قۇشقان. ەندى ەل وپپوزيتسياسى ۇكىمەتتەن جالپىحالىقتىق لوكداۋن ەنگىزۋدى سۇراپ وتىر.

وپپوزيتسيانىڭ بۇل ۇسىنىسىنا قارسىلىق بىلدىرگەن پرەمەر-مينيستر جالپىۇلتتىق لوكداۋن بىلتىرعىداي ەكونوميكا ءۇشىن اۋىر سوققى بولادى دەيدى. وتكەن جىلى شەكتەۋ شاراسى داعدارىسقا اكەپ سوقتىرعان. دەگەنمەن، وپپوزيتسيا وكىلدەرى پاندەمياعا توسقاۋىل بولۋدىڭ بىردەن-ءبىر جولى لوكداۋن دەيدى. ۆيرۋس ءورشىپ تۇرعان شتات باسشىلىعى ۇكىمەتتىڭ رۇقساتىن كۇتپەستەن جەرگىلىكتى دەڭگەيدە شەكتەۋ شارالارىن ەنگىزگەن. حالىقارالىق ۇيىمدار دا كارانتين جاريالاۋ دۇرىس شەشىم ەكەنىن ايتادى.

وتكەن اپتادا تاۋلىكتىك ءوسىم 400 مىڭنان اسىپ كەتكەن ەدى. قازىر بۇل سان 350-380 مىڭ شاماسىندا. دەگەنمەن، مۇنىڭ ءوزى دە جانتۇرشىگەرلىك كورسەتكىش ەكەنى تۇسىنىكتى. وسىلايشا ۆيرۋس جۇقتىرۋ دەرەگى 20 ميلليوننان اسىپ كەتتى. 222 مىڭى كوز جۇمعان. ساراپشىلار شىندىعىندا بۇل ساندار الدەقايدا جوعارى بولۋى مۇمكىن ەكەنىن ايتادى.

الەمدەگى ەڭ ءىرى ۆاكتسينا ءوندىرۋشىسى، ۇندىلىك Serum ينستيتۋتىنىڭ باسشىسى ادار پۋناۆالا نارەندرا مودي ۇكىمەتىن ءۇندىستاندا حالىقتى ۆاكتسيناتسيالاۋ ءۇشىن ءدارى-دارمەكتەر جەتىسپەيدى دەپ ايىپتادى. ساراپشى ءۇندىستان بيلىگىنە ناۋرىزعا دەيىن، اۋرۋدىڭ ەكىنشى تولقىنى ەلگە ەنگەن كەزدە ۆاكتسيناتسيانى باستاۋدى ەسكەرتكەن. ال وسى ۋاقىتقا دەيىن تەك 21 ميلليون دوزاعا تاپسىرىس بەرىلگەن.

لوندوندا ءوتىپ جاتقان «ۇلكەن جەتىلىك» ەلدەرى سىرتقى ىستەر مينيسترلەرىنىڭ وتىرىسىندا ءۇندىستان دەلەگاتتارى تۇگەل وقشاۋلاندى. سەبەبى بۇعان دەيىن دەلەگاتسيا وكىلدەرىنىڭ سovid-19-عا تاپسىرعان تەستىلەرىنىڭ ەكەۋى وڭ ناتيجە كورسەتكەن.

"The Qazaq Times"