ميزيەەۆ اليەۆتى جەڭىسىمەن تاعى ءبىر مارتە قۇتتىقتادى. فوتو: ەكسپرەسس ك.

وزبەكستان پرەزيدەنتى ورتا ازيا ەلدەرى اراسىنان ءبىرىنشى بولىپ تاۋلى قاراباق ماسەلەسى تۋرالى اشىق پىكىر ءبىلدىردى. شاۆكات ميرزيەەۆ قاراباق سوعىسىنىڭ ناتيجەسىن ءازىربايجاننىڭ ءبىر رەتكى تاريحي جەڭىسى قاتارىندا باعالاعان.

ازىربايجەن مەن ارمەنيا اراسىنداعى تاۋلى قاراباق قاقتىعىسى رەسەيدىڭ ىقپالى باسىم تمد ەلدەرى، اسىرەسە ازىربايجانمەن باۋىرلاس ورتالىق ازيا ەلدەرى ءۇشىن سەزىمتال تاقىرىپ بولاتىن. سونىڭ ىشىندە، ازىربايجانمەن تاريحي تامىرلاس، تۋىستاس بولعانىمەن رەسەي جانە ارمەنيامەن ەكونوميكالىق وداق ىشىندەگى قازاقستان مەن قىرعىزستان ءۇشىن قاراباق سوعىسىنا باعا بەرۋ قيىنعا سوققان. قازاق پەن قىرعىز بيلىگى باكۋ مەن ەرەۆانعا بىرجاقتى قولداۋ كورسەتۋدەن بارىنشا اينالىپ وتۋگە تىرىسقان.

بىرەر كۇن بۇرىن وتكەن تۇركى ءتىلدى مەملەكەتتەردىڭ ىنتىماقتاستىق كەڭەسىنڭ سامميتىندە وزبەك باسشىسى قاراباق سوعىسىن «ءازىربايجاننىڭ تاريحي ادىلەتتىلىكتى قايتارۋ جولىنداعى جەڭىسى» دەپ باعالادى جانە وڭىردەگى مادەني-تاريحي مۇرالاردى قالپىنا كەلتىرۋدە باۋىرلاس ءازىربايجان جۇرتىنا قولداۋ كورسەتۋگە دايىن ەكەنىن ءبىلدىردى. ءتىپتى، سامميت بارىسىندا يليحام اليەۆتى تاعى ءبىر مارتە جەڭىسىمەن قۇتتىقتادى.

وزبەكستاننىڭ تاۋلى قاراباق ءىسى بويىنشا ءازىربايجاندى اشىق قولداۋى كوپتەگەن ەلدىڭ ساياساتكەرلەرى مەن ساراپشىلارىنىڭ نازارىن اۋدارارى ءسوزسىز. بۇل سونداي-اق وزبەكستان سىرتقى ساياساتىنداعى رەسەيگە تاۋەلسىز ۇستانىمىن دا ايقىندايدى. تاشكەنت بۇنداي مالىمدەمەنى جاساي وتىرىپ ماسكەۋدىڭ دە وزىنە دەگەن جاڭا ۇستانىمىنا يە بولۋى مۇمكىن.

قازاقستانمەن سالىستىرعاندا وزبەكستاننىڭ قاراباق سوعىسىنا اشىق پىكىر ايتۋىنا مۇمكىندىك كوپ. ەڭ اۋەلى تاشكەنت پەن ەرەۆان ورتاسىندا ديپلوماتيالىق قارىم-قاتىناس ونشا ەمەس. تاراپتار ءبىر-بىرىنە ەلشى دە الماسپاعان. وزبەكستاننىڭ ەكى پرەزيدەنتى دە ەشقاشان ارمەنياعا مەملەكەتتىك ساپارمەن بارعان ەمەس. قالاي دەگەن كۇندە دە ورتا ازياداعى تۇركى تىلدەس ەلدەر اراسىندا باۋىرلاس ءازىربايجاندى قولداپ شىققان العاشقى ەل رەتىندە وزبەكستاننىڭ تۇركى ءتىلدى رەسپۋبليكالار اراسىنداعى ابروي بەدەلى ارتپاق.

“The Qazaq Times”